لاۆروۆتىڭ ساندىراعى: دەپۋتات جاۋاپ بەردى، مينيستر نەگە ءۇنسىز؟

2644
Adyrna.kz Telegram

رەسەيدىڭ سىرتقى ىستەر ءمينيسترى سەرگەي لاۆروۆ "رەسەي مەن قازاقستان: شەكاراسىز ارىپتەستىك" اتتى ماقالاسىندا "قازاقستانداعى ورىستىلدىلەرگە قىسىم" اتتى ويدان شىعارىلعان تاقىرىپتى تاعى دا قوزعادى.

لاۆروۆ بىلاي دەيدى: "قازاقستان مەن رەسەيدىڭ جاڭا تاريحىندا ەكى ەل ارىپتەستىك پەن ۇلتتىق قاتىناس ساياساتىندا قوعامدى بىرىكتىرۋ، حالىقتار اراسىنداعى گارمونيانى ساقتاۋدى ءساتتى ىسكە اسىرۋدا. وكىنىشكە وراي سوڭعى ۋاقىتتا ءبىز قازاقستانداعى ءورىستىلدى تۇرعىندارعا قاتىستى كسەنوفوبيالىق ارەكەتتەرگە كۋا بولدىق. جەكەلەگەن جاعدايلار سىرتتان ارنايى اقپاراتتىق ادىستەمە بەرۋ ارقىلى ىسكە اسىپ، رەسەيمەن قاتىناستى ناشارلاتۋ مەن جەرگىلىكتى ۇلتشىلدىقتى دارىپتەۋگە باعىتتالعان".

بۇل ساندىراققا ءماجىلىس دەپۋتاتى سنەجاننا يماشەۆا جاۋاپ قاتتى. دەپۋتات بىلاي دەدى "ازاتتىققا" بەرگە قىسقاشا پىكىرىندە: "قازاقستاندا ەشقانداي كسەنوفوبيا جوق. مەن ءوزىم بەلارۋسپىن. ەشقاشان دا ءوزىم كسەنوفوبيانى، تەرىس قاراعاندى سەزىنگەن جوقپىن. باستى قاتىرماسىن" . مىنە، قىسقا-نۇسقا تۇسىنىكتى جاۋاپ.

بۇل دەپۋتاتتىڭ جاۋابى. بىراق ءبىزدىڭ ءسىم ءۇنسىز. رەسەيلىك ارىپتەسىنە جاۋاپ قاتاتىن جان تابىلماعانى ما؟ رەسەيدىڭ مينيسترىنە جاۋاپ مينيسترلىك تاراپىنان بولۋى زاڭدىلىق ەمەس پە؟! الايدا ءالى جاۋاپ تا، پىكىر دە ايتىلمادى. ماسكەۋ "ۇندەمەۋ دەگەنىمىز - كەلىسۋ" دەپ تۇسىنەرى انىق. جالپى رەسەي قوعامى وسى پرينتسيپپەن كۇن كەشەدى.

رەسەي بيلىگى "ورىستىلدىلەرگە قىسىم" اتتى ەرتەگىنە شىعارىپ، ءوز اۋديتورياسىن سوعان سەندىرىپ، ەندى ونى قازاقستان بيلىگىنە قىسىم جاساۋ ءۇشىن قولدانۋدا. "ورتالىق ازيادان كەلگەندەر كەتىڭدەر" دەپ ۇراندايتىر كسەنوفوبيانىڭ وتانى سانالاتىن رەسەيدىڭ بۇل قىسىمىنا جاۋاپ انىق ءارى ناقتى بولۋى ءتيىس. "بۇعا بەرسەڭ، سۇعا بەرەدى" دەگەن اتام قازاق. ۇندەمەي قالۋ نەمەسە بايقاماعان سىڭاي تانىتۋ كەيدە اسقان ديپلوماتيانىڭ بەلگىسى ەمەس-اۋ.

قازاق جەرىنە قاتىستى نيكونوۆ، فەدوروۆ پەن جيرينوۆسكيلەر اۋزىنا كەلگەنىن ايتىپ، ساندىراقتاعان ءساتتى دە كوردىك. سوڭعى ەكى جىلدا رەسەيدىڭ شەكارالاس كورشىلەرىنە قىسىم ساياساتىن ۇستانىپ، قىر كورسەتۋى ارتتى. "اۋماقتىق تۇتاستىق پەن ءتىل ماسەلەسىن" قوزعاپ، شۋ شىعارۋدا.

2020 جىلدىڭ، 21-ماۋسىمىندا پۋتين "كەڭەس وداعى قۇرىلعان كەزدە، وداقتان شىعۋ قۇقىعى جايلى جازىلدى، الايدا شىعۋ ءۇردىسى جازىلماعاندىقتان ۇلكەن سۇراق تۋىندايدى: ەگەر قانداي دا ءبىر ەل كەڭەس وداعىنا كىرگەن سوڭ وزىنە رەسەيدىڭ تاريحي جەرىنەن ۇلكەن اۋماعىن السا، ارتىنشا وداقتان شىققىسى كەلسە، وندا قانداي جەرمەن كىردى، سونداي جەرمەن شىقسىن. ورىس حالقىنىڭ سىيلىعىن وزىمەن بىرگە الا كەتتى. ونىڭ بىردە بىرەۋى جازىلمادى عوي. مەن ءبىزدىڭ كونستيتۋتسياعا وزگەرىس ەنگىزىپ جاتقانىمىزدى دۇرىس سانايمىن" دەگەن ەدى. ارتىنشا رەسەيلىك ساياساتكەر ۆياچەسلاۆ نيكونوۆ "بولشايا يگرا" باعدارلاماسىندا: "قازاقستان بولعان جوق، سولتۇستىك قازاقستاندا بۇرىن مۇلدە حالىق قونىستانباعان ەدى. ولار بولعان، بىراق وڭتۇستىككە جاقىن. شىن مانىندە، قازاقستان تەرريتورياسى - رەسەي مەن كەڭەس وداعىنىڭ ۇلكەن سىيلىعى", - دەدى. فەدوروۆ پەن مەدينسكي دە اۋماقتىق تۇتاستىعىمىزعا كۇمان كەلتىرە سويلەدى. جيرينوۆسكي ءتىپتى "قازاقتار وزدەرىنە قالا سالىپ، قازاقشا اتاپ السىن. پەتروپاۆل مەن پاۆلودار سىندى قالالارعا تيىسپەسىن" دەدى.

ولارعا سەنات دەپۋتاتى نۇرتورە ءجۇسىپ، حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد جانە قوعام بەلسەندىلەرى جاۋاپ قاتتى. مينيسترلىك نارازىلىق نوتاسىن جولدادى. الايدا اۋماقتىق تۇتاستىققا كەلگەندە رەاكتسيا تانىتقان مينيسترلىك، "تىلدىك قىسىم" دەگەن وتىرىككە قاتاڭ رەاكتسيا تانىتپاي وتىر.

اسحات قاسەنعالي،

"ادىرنا" ۇلتتىق پورتالى

پىكىرلەر