Lavrovtyń sandyraǵy: Depýtat jaýap berdi, mınıstr nege únsiz?

2643
Adyrna.kz Telegram

Reseıdiń Syrtqy ister mınıstri Sergeı Lavrov "Reseı men Qazaqstan: shekarasyz áriptestik" atty maqalasynda "Qazaqstandaǵy orystildilerge qysym" atty oıdan shyǵarylǵan taqyrypty taǵy da qozǵady.

Lavrov bylaı deıdi: "Qazaqstan men Reseıdiń jańa tarıhynda eki el áriptestik pen ulttyq qatynas saıasatynda qoǵamdy biriktirý, halyqtar arasyndaǵy garmonııany saqtaýdy sátti iske asyrýda. Ókinishke oraı sońǵy ýaqytta biz Qazaqstandaǵy orystildi turǵyndarǵa qatysty ksenofobııalyq áreketterge kýá boldyq. Jekelegen jaǵdaılar syrttan arnaıy aqparattyq ádisteme berý arqyly iske asyp, Reseımen qatynasty nasharlatý men jergilikti ultshyldyqty dáripteýge baǵyttalǵan".

Bul sandyraqqa Májilis depýtaty Snejanna Imasheva jaýap qatty. Depýtat bylaı dedi "Azattyqqa" berge qysqasha pikirinde: "Qazaqstanda eshqandaı ksenofobııa joq. Men ózim belarýspyn. Eshqashan da ózim ksenofobııany, teris qaraǵandy sezingen joqpyn. Basty qatyrmasyn" . Mine, qysqa-nusqa túsinikti jaýap.

Bul depýtattyń jaýaby. Biraq bizdiń SIM únsiz. Reseılik áriptesine jaýap qatatyn jan tabylmaǵany ma? Reseıdiń mınıstrine jaýap mınıstrlik tarapynan bolýy zańdylyq emes pe?! Alaıda áli jaýap ta, pikir de aıtylmady. Máskeý "úndemeý degenimiz - kelisý" dep túsineri anyq. Jalpy Reseı qoǵamy osy prınıppen kún keshedi.

Reseı bıligi "orystildilerge qysym" atty ertegine shyǵaryp, óz aýdıtorııasyn soǵan sendirip, endi ony Qazaqstan bıligine qysym jasaý úshin qoldanýda. "Ortalyq Azııadan kelgender ketińder" dep urandaıtyr ksenofobııanyń otany sanalatyn Reseıdiń bul qysymyna jaýap anyq ári naqty bolýy tıis. "Buǵa berseń, suǵa beredi" degen atam qazaq. Úndemeı qalý nemese baıqamaǵan syńaı tanytý keıde asqan dıplomatııanyń belgisi emes-aý.

Qazaq jerine qatysty Nıkonov, Fedorov pen Jırınovskııler aýzyna kelgenin aıtyp, sandyraqtaǵan sátti de kórdik. Sońǵy eki jylda Reseıdiń shekaralas kórshilerine qysym saıasatyn ustanyp, qyr kórsetýi artty. "Aýmaqtyq tutastyq pen til máselesin" qozǵap, shý shyǵarýda.

2020 jyldyń, 21-maýsymynda Pýtın "Keńes Odaǵy qurylǵan kezde, odaqtan shyǵý quqyǵy jaıly jazyldy, alaıda shyǵý úrdisi jazylmaǵandyqtan úlken suraq týyndaıdy: Eger qandaı da bir el Keńes Odaǵyna kirgen soń ózine reseıdiń tarıhı jerinen úlken aýmaǵyn alsa, artynsha Odaqtan shyqqysy kelse, onda qandaı jermen kirdi, sondaı jermen shyqsyn. Orys halqynyń syılyǵyn ózimen birge ala ketti. Onyń birde bireýi jazylmady ǵoı. Men bizdiń Konstıtýııaǵa ózgeris engizip jatqanymyzdy durys sanaımyn" degen edi. Artynsha reseılik saıasatker Vıacheslav Nıkonov "Bolshaıa ıgra" baǵdarlamasynda: "Qazaqstan bolǵan joq, Soltústik Qazaqstanda buryn múlde halyq qonystanbaǵan edi. Olar bolǵan, biraq ońtústikke jaqyn. Shyn máninde, Qazaqstan terrıtorııasy - Reseı men Keńes Odaǵynyń úlken syılyǵy", - dedi. Fedorov pen Medınskıı de aýmaqtyq tutastyǵymyzǵa kúmán keltire sóıledi. Jırınovskıı tipti "qazaqtar ózderine qala salyp, qazaqsha atap alsyn. Petropavl men Pavlodar syndy qalalarǵa tıispesin" dedi.

Olarǵa Senat depýtaty Nurtóre Júsip, Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed jáne qoǵam belsendileri jaýap qatty. Mınıstrlik narazylyq notasyn joldady. Alaıda aýmaqtyq tutastyqqa kelgende reakııa tanytqan mınıstrlik, "tildik qysym" degen ótirikke qatań reakııa tanytpaı otyr.

Ashat QASENǴALI,

"Adyrna" ulttyq portaly

Pikirler