2026 جىلدىڭ قاڭتارىندا قازاقستان مۇنايىن الەمدىك نارىقتارعا جەتكىزۋ كولەمى كاسپي قۇبىر كونسورتسيۋمى ارقىلى ايتارلىقتاي ازايدى، دەپ حابارلايدى "ادىرنا" ۇلتتىق پورتالى Bloomberg اگەنتتىگىنە سىلتەمە جاساپ.
اگەنتتىك تاراتقان اقپاراتتا، مۇناي جەتكىزۋ جوسپارلانعان دەڭگەيدەن شامامەن 45%-عا تومەندەگەن. بۇعان قولايسىز اۋا رايى، جوندەۋ جۇمىستارىنىڭ سوزىلۋى جانە دروندار شابۋىلىنىڭ سالدارى اسەر ەتكەن.
ترەيدەرلەردىڭ مالىمەتىنشە، وسى ايدا CPC Blend ماركالى مۇناي ەكسپورتى تاۋلىگىنە 800–900 مىڭ باررەلدى عانا قۇرايدى. ۇسىنىستىڭ تاپشىلىعى باعانىڭ وسۋىنە اكەلىپ، قازاقستاندىق مۇناي ءبىر جىلدا العاش رەت پرەميامەن ساۋدالانا باستادى. سوڭعى مامىلەلەر Dated Brent ەتالونىنا باررەلى $1,2 ۇستەمەمەن جاسالعان.
نەگىزگى ماسەلە — نوۆوروسسيسك ماڭىنداعى تەڭىز تەرمينالىنىڭ جۇمىسى. تولىق جۇكتەۋ ءۇشىن ەكى شىعىرمالى ايلاق قۇرىلعىسى قاجەت، الايدا قازىر ولاردىڭ بىرەۋى عانا تۇراقسىز رەجيمدە جۇمىس ىستەپ تۇر.
سوڭعى اپتالاردا داۋىل سالدارىنان مۇنايدى تيەۋ جۇمىستارى دا بىرنەشە رەت توقتادى. ەكىنشى ستانتسيانىڭ تەحنيكالىق قىزمەتتەن ورالۋى كەشىگىپ جاتىر. ال ايلاق قۇرىلعىسى قاراشانىڭ سوڭىندا زاقىمدانعان.
Energy Aspects ساراپشىلارىنىڭ ايتۋىنشا، تەرمينالداعى ۇزدىكسىز ىركىلىستەر Brent ماركاسىنا سۇرانىستى قولداپ وتىر.
ال قازاقستان تاۋلىگىنە شامامەن 1,8 ملن باررەل مۇناي وندىرەدى. كقك تولىق قۋاتتا جۇمىس ىستەمەسە، بالاما باعىتتارمەن ەكسپورت كولەمى بۇل كورسەتكىشتىڭ جارتىسىنا عانا جەتەدى. ۇزاققا سوزىلعان ىركىلىس كەن ورىندارىندا ءماجبۇرلى ءوندىرىس قىسقارۋىنا اكەلۋى مۇمكىن.
كاسپي قۇبىر كونسورتسيۋمى — قازاقستان مۇنايىن رەسەي اۋماعى ارقىلى نوۆوروسسيسك پورتىنا جەتكىزەتىن نەگىزگى ەكسپورتتىق مارشرۋت. كونسورتسيۋم اكتسيونەرلەرى قاتارىندا قازاقستان، رەسەي جانە Chevron, ExxonMobil بار.
ايتا كەتەيىك، سوڭعى شابۋىلدان كەيىن ايلاق قۇرىلعىسى وتكەن جىلدىڭ 29 قاراشاسىندا توقتاعان ەدى.
