مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىندە مەملەكەت باسشىسى قاسىم-جومارت توقاەۆتىڭ حالىققا جولداۋىن تالقىلاۋعا قاتىستى جيىن ءوتتى. وقۋ ورنىنىڭ ستۋدەنتتەرى جانە وقىتۋشىلارى جولداۋدى ناسيحاتتاۋعا بايلانىستى اقپاراتتىق-ناسيحات توبىنىڭ مۇشەسى ساكەن ماجىنبەكوۆپەن جۇزدەستى.
بارلىق سانيتارلىق تالاپتى ساقتاي وتىرىپ وتكەن كەزدەسۋدە ساكەن ارالبايۇلى الەم تاريحىنداعى مەملەكەت باسشىلارىنىڭ ەل حالقىنا جولداۋى يگى ءداستۇر ەكەنىنە توقتالىپ، تاريحتاعى وسىنداي ءبىرىنشى قۇجاتتى 1822 جىلى اقش-تىڭ سول كەزدەگى پرەزيدەنتى دجەيمس مونرو جاريالاعانىنا توقتالدى. ال تاۋەلسىز قازاقستان تاريحىنداعى العاشقى جولداۋ 1997 جىلى قابىلدانعانىن ايتتى. ول – قر تۇڭعىش پرەزيدەنتى – ەلباسى ن.نازارباەۆتىڭ باستاماسىمەن قابىلدانعان «قازاقستان – 2030 ستراتەگيالىق باعدارلاماسى».
– مەملەكەت باسشىسى قاسىم-جومارت توقاەۆتىڭ بيىلعى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋى – اسا ماڭىزدى قۇجات. وزدەرىڭىزگە بەلگىلى، 2020 جىلى دۇنيە ءجۇزى پاندەمياعا تاپ بولدى. سونىڭ سالدارىنا ءالى دە كەرى اسەرىن تيگىزۋدە. اسىرەسە، ەكونوميكالىق داعدارىستىڭ سالقىنى قاتتى سەزىلۋدە. مەملەكەت باسشىسى، مىنە، وسىنداي جاپپاي داعدارىس كەزىندەگى ەل دامۋىنا نەگىز بولاتىن باستى باعىتتاردى ايقىنداپ، ناقتى تاپسىرمالار جۇكتەپ وتىر. ال سىزدەر، وسكەلەڭ ۇرپاق، «ەلگە مەن نە بەرە الامىن؟» دەگەن پرينتسيپپەن وقىپ، دامىپ، تۇلعا بولىپ، مەملەكەتىمىزدىڭ دامۋىنا ۇلەس قوسۋلارىڭىز كەرەك. سىزدەر دە الەمدى جاقسى جاعىنا وزگەرتۋگە ۇمتىلىڭىزدار! – دەدى ساكەن ارالبايۇلى.
جيىن سوڭىندا جاستار وزدەرىن تولعاندىرعان سۇراقتارىن قويىپ، جاۋاپ الدى.
