شىمكەنتتە "ۇلتتىق ساراپتاما ورتالىعى" شجق رمك مەن ءيزرايلدىڭ AID Genomics حالىقارالىق گەنومدىق كومپانياسى اراسىنداعى كەلىسىم اياسىندا كوروناۆيرۋستىق ينفەكتسيانى دياگنوستيكالاۋعا ارنالعان زەرتحانالىق كەشەن اشىلدى.
كەشەننىڭ اشىلۋىنا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان، ءيزرايلدىڭ قازاقستانداعى ەلشىلىگى ميسسياسى باسشىسىنىڭ ورىنباسارى جانە تاعى باسقا قوناقتار قاتىستى.
اشىلعان زەرتحانالىق كەشەندى جۇقپالى اۋرۋلاردى دياگنوستيكالاۋعا مامانداندىرىلعان AID Genomics كومپانياسى زەرتحاناعا ارناپ گۋمانيتارلىق كومەك رەتىندە كوۆيد-19 زەرتتەۋ جابدىقتارىمەن قامتاماسىز ەتتى. ال بۇل زەرتحانالىق جابدىقتار تاۋلىگىنە 2500-گە دەيىن تەست انىقتاۋعا قابىلەتتى، ونىمدىلىگى جوعارى تولىق اۆتوماتتاندىرىلعان كەشەن بولىپ سانالادى
بۇدان بولەك ناتيجەلەردى قالىپتاستىرۋ، پروتسەستى مونيتورينگتەۋ جانە جەدەلدەتۋ ءۇشىن جاساندى ينتەللەكت تەحنولوگياسىن پايدالاناتىن باعدارلاما پايدالانۋعا بەرىلەتىن بولدى. ال بۇل ءوز كەزەگىندە ادام فاكتورىنىڭ اسەرىن بارىنشا ازايتادى جانە ناتيجەلەردىڭ دالدىگىن قامتاماسىز ەتەدى. سونداي-اق، كوۆيد-تەستىلەۋ كەشەنى جوعارى ءونىمدى، جىلدام، ءدال ناتيجە بەرەدى. اتالمىش جابدىق شىمكەنت قالاسى بويىنشا كاسىپورىن بازاسىندا ورناتىلدى.
جالپى، AID Genomics - قاتەرلى ىسىك جانە جۇقپالى اۋرۋلارمەن اۋىراتىن ناۋقاستاردى دياگنوستيكالاۋ مەن ەمدەۋدى جۇزەگە اسىراتىن مەديتسينالىق تەحنولوگيالارعا ماماندانعان حالىقارالىق كومپانيالار توبى. وندا ونكولوگيا، مولەكۋلالىق بيولوگيا، مولەكۋلالىق پاتولوگيا، گەنوميكا جانە بيوينفورماتيكا سالاسىنداعى جەتەكشى ماماندارى جۇمىس ىستەيدى.
سوندىقتان ءيزرايلدىڭ كوروناۆيرۋسپەن كۇرەستەگى جەتىستىكتەرىنىڭ اياسىندا زەرتحانالىق جابدىقتىڭ بەرىلۋى ينفەكتسيالىق اۋرۋلاردىڭ تارالۋىن بولدىرماۋعا زور مۇمكىندىك بەرەتىن بولادى.
زەرتحانالىق كەشەن اشۋ باستاماسى قازاقستاننىڭ يزرايلدەگى ەلشىلىگىنىڭ قولداۋىمەن جۇزەگە اسىرىلىپ وتىر.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
