شىمكەنتتە ءۇش اۋىسىمداعى مەكتەپتەر ماسەلەسى 2024 جىلعا دەيىن شەشىلەدى. اتالعان جۇمىستار ءبىلىم سالاسىن دامىتۋدىڭ 5 جىلدىق جوسپارىندا قامتىلعان. مۇنداي وزەكتى ماسەلەنىڭ تۇبەگەيلى شەشىلۋى ءبىلىمدى ۇرپاق تاربيەسى ءۇشىن وتە ماڭىزدى.
قالادا 10-11 سىنىپتارعا ارنالعان «125 HIGH SCHOOL» مەكتەبى ۇلتتىق بىرىڭعاي تەستىلەۋگە قاتىساتىن وقۋشىلار ءۇشىن ەرەكشەلەنىپ وتىر. اتالعان مەكتەپ تاۋەلسىزدىكتىڭ 30 جىلدىعى قارساڭىندا 1 قىركۇيەكتەن باستاپ ءوز جۇمىسىن باستادى. قازىر مۇندا 254 وقۋشىعا 48 مۇعالىم ۇبت سىناعىنىڭ جەتى باعىتى نەگىزىندە ءبىلىم بەرۋدە. مەكتەپ ديرەكتورى ورالعان تەمىرحانۇلىنىڭ سوزىنشە، مەكتەپتە وقۋشىلارعا ءبىلىم بەرۋ اقىلى تۇردە جۇرگىزىلەدى. دەگەنمەن، جان باسىنا قارجىلاندىرۋ باعىتى بويىنشا «قارجى ورتالىعىنا» قۇجات تاپسىرىپ، ءوتىنىم بەرىلگەن.
ء–بىزدىڭ مەكتەپتە وقۋشىلاردىڭ الەۋمەتتىك جاعدايىنا قاراي 8 ءتۇرلى جەڭىلدىك قارالعان. مەملەكەت تاراپىنان مەكتەبىمىز قارجىلاندىرىلسا ءبىلىم الۋشىلاردىڭ تولەماقىسىنا كوپ جەڭىلدىك بولار ەدى. وسى ماقساتتا قۇجاتتارىمىزدى ءتيىستى مەكەمەگە تاپسىرىپ، جاۋابىن كۇتىپ وتىرمىز، -دەدى ول.
«125 HIGH SCHOOL» مەكتەبى ەلىمىزدىڭ 7 وڭىرىندە وقۋ ورتالىعى نەگىزىندە جۇمىسىن باستاعان. قازىر 27 ورتالىق ىشىندە جەتەۋى مەملەكەتتىك ليتسەنزياسى بار مەكتەپتەر جەلىسى بولىپ جۇمىسىن جالعاستىرۋدا. ءبىلىم مەكەسىنىڭ نەگىزگى ميسسياسى – ءبىتىرۋشى سىنىپتاردى مەكتەپ پەن دايىندىق كۋرسىن ەكى جاقتى وقىماي، ارنايى مەتوديكا نەگىزىندە ءبىر جەردەن ءبىلىم بەرۋ.
ۇستازداردىڭ ايتۋىنشا، ءبىلىم الۋشىلاردىڭ 70 پايىزى حيميا-بيولوگيا مەن فيزيكا-ماتەماتيكانى تاڭداعان. سونىمەن بىرگە، گەوگرافيا –ماتەماتيكا، دۇنيەجۇزى تاريحى-اعىلشىن ءتىلى جانە ادامنىڭ قوعامداعى قۇقىعى-تاريح باعىتىندا وقيدى.
مەكتەپ كاسىبي باعدار بەرۋ، كومپيۋتەرلىك تەستىلەۋ، مەنتورلىق جۇيە، «كوۆوركينگتى» ورتالىق جانە ساباقتان تىس ۋاقىتتا ۇيىمداستىرىلاتىن موتيۆاتسيالىق ءىس-شارالار وتكىزۋ جۇيەسىن دە ءتيىمدى جۇزەگە اسىرۋدا.
