شىمشاھاردا قر تاۋەلسىزدىگىنىڭ 30 جىلدىعى اياسىندا قالا اكىمى مۇرات ايتەنوۆتىڭ باستاماسىمەن ءۇش اۋداندا جاستارعا ارنالعان ورتالىقتار پايدالانۋعا بەرىلدى.
قاراتاۋ اۋدانىنداعى جاڭا ورتالىقتىڭ اشىلۋ سالتاناتىنا قاتىسقان شاھار باسشىسى مۇرات دۇيسەنبەكۇلى اۋدان جاستارىن زاماناۋي رەسۋرستىق ورتالىقتىڭ اشىلۋىمەن قۇتتىقتادى.
– رەسپۋبليكالىق ستاتۋسقا يە بولعالى قالامىز جان-جاقتى دامىپ كەلەدى. شاھارداعى حالىقتىڭ ورتاشا جاسى 28-ءدى قۇرايدى. بۇل دەگەنىمىز شىمكەنتتى جاستار قالاسى دەۋگە بولادى دەگەن ءسوز. ال جاستارعا زاماناۋي ورتالىقتار قاجەت.
جالپى ەندى مۇنىڭ ءبارى مەملەكەتىمىزدىڭ جاستارعا دەگەن كوڭىلى. ەرتەڭگى جاستار – ەلىمىزدىڭ ىرگەتاسى. سولارعا ءبىلىم بەرۋ، جاعداي جاساۋ، جاڭا زاماناۋي تسەنترلەردى اشۋ – مەملەكەتىمىزدىڭ باستى باعدارلامالارى، باستى باعىتتارى بولىپ تابىلادى، - دەدى قالا اكىمى.
مۇنان سوڭ، شاھار باسشىسى قاراتاۋ اۋداندىق جاستار ورتالىعىنىڭ جۇمىسىمەن تانىسىپ، «قازاقستان جاستار كونگرەسى» زاڭدى تۇلعالار بىرلەستىگىنىڭ اتقارۋشى ديرەكتورى توقتار بولىسوۆتىڭ ىنتىماقتاستىق مەموراندۋمىنا قول قويدى.
ال قالالىق «جاستار رەسۋرستىق ورتالىعى» كمم-ءنىڭ باسشىسى ەرلان ايتباەۆتىڭ ايتۋىنشا، جاڭا عيمارات جاستارعا قىزمەت كورسەتۋ ورتالىعى قاعيداتى بويىنشا (جۇمىسقا ورنالاستىرۋ، تۇرعىن ءۇي ماسەلەلەرى، مەملەكەتتىك باعدارلامالار، كاسىپكەرلىك جانە ت.ب.) جۇمىس ىستەيتىن بولادى.
سونداي-اق، قولدانىستاعى مەملەكەتتىك باعدارلامالار، جاستارعا ارنالعان مۇمكىندىكتەر جانە قالادا جۇرگىزىلىپ جاتقان رەفورمالار، جاس وتباسىلار اراسىندا اجىراسۋدىڭ الدىن الۋ، NEET ساناتىنداعى جاستارمەن جۇمىس، جاستارعا ءانونيمدى پسيحولوگيالىق كومەك كورسەتۋ، جاستار مەن جاستار ۇيىمدارىنا قۇقىقتىق، ادىستەمەلىك كومەك كورسەتۋ تۋرالى كەڭەستەر وتكىزىلەدى.
ازامات جاپپار،
سەرىك قوساەۆ
