بۇگىن اقپاراتتىق-كوممۋنيكاتسيالىق ورتالىعىندا شىمكەنت قالالىق دەنساۋلىق ساقتاۋ باسقارماسىنىڭ باسشىسى ب.پوزيلوۆتىڭ قاتىسۋىمەن بريفينگ ءوتتى.
ءباسپاسوز ماجىلىسىندە باسقارما باسشىسى قالاداعى ەپيدەميولوگيالىق احۋالدىڭ كۇردەلى ەكەنىن ايتىپ، تۇرعىنداردى جالعان اقپاراتتاردىڭ جەتەگىندە كەتپەۋگە شاقىردى.
– قازىرگى تاڭدا شىمكەنت قالاسى «قىزىل» ايماقتا. قالاداعى ەپيداحۋال تۇراقسىز. تۇرعىندارعا ايتارىم: ساقتانىپ جۇرىڭىزدەر. كوۆيد جۇقتىرىپ، ەمحاناعا ءتۇسىپ جاتقان ادام سانى ازايماي وتىر. دارىگەردىڭ حاتتاماسىمەن عانا ەمدەلىڭىزدەر. وزدىگىنەن ەمدەلۋدىڭ سالدارىنان ناۋقاستىڭ كوبىسى ەمحاناعا اۋىر حالدە جەتكىزىلىپ جاتىر. سول سەبەپتى اسقىنعان اۋرۋدى ەمدەۋ ناتيجەسىن بەرمەۋدە. ال جالعان اقپاراتتارعا الدانىپ، انتيۆاكتسەرلەرگە سەنبەڭىزدەر. وسى ورايدا، ەكپە جايلى قارسى پىكىر (انتيۆاكتسەرلەر) بىلدىرۋشىلەردى ەرىكتى بولىپ، ءمان-جايدىڭ بارىسىن بىرگە باقىلاپ كورۋگە شاقىرامىن. بۇل رەتتە دارىگەرلەر كۇندىز-ءتۇنى جانىن سالىپ دەرتپەن كۇرەسۋدە. قۇرمەتتى قالا تۇرعىندارى، ۆاكتسينا قابىلداڭىزدار. اۋرۋدىڭ الدىن الۋعا ءبارىمىز ءبىر كىسىدەي اتسالىسايىق! – دەدى باقىتجان جولداسبەكۇلى.
سپيكەردىڭ سوزىنشە، قازىرگى تاڭدا ءۇشىنشى مەگاپوليستە 7 397 ناۋقاس ەمدەلىپ جاتىر. ونىڭ ىشىندە 4 809 ناۋقاس ءۇي جاعدايىندا امبۋلاتورلىق، 2 588 ناۋقاس ستاتسيوناردا ەم قابىلداۋدا. ال وتكەن تاۋلىكتە COVID-19 ينفەكتسياسىن جۇقتىرۋدىڭ 535 جاعدايى تىركەلگەن.
سونىمەن قاتار، ەكپە الۋ بويىنشا شىمكەنت شاhارى ەلىمىز بويىنشا 1-ورىندا تۇر. بۇگىنگى ءتيىستى كونتينگەنتتىڭ (536 000 ادام) 1-كومپونەنتى 70,2%، 2-كومپونەنتى 54 پايىز ۆاكتسيناتسيالانعان.
ايتا كەتەيىك، قالا اكىمدىگى جانىنان اشىلعان «call-center» تاۋلىك بويى جۇمىس جاساۋدا. ال قالاداعى بيزنەس سۋبەكتىلەرى ءۇشىن «Ashyq» جوباسى ىسكە قوسىلعان.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – سەرىك قوساەۆ
