المالى اۋداندىق سوتىندا مۇحتار اۋەزوۆ اتىنداعى قازاق مەملەكەتتىك اكادەميالىق تەاترىنىڭ ەكس-ديرەكتورى ەرلان ءبىلالوۆتىڭ ءىسى بويىنشا سوت تالقىلاۋى جالعاسىپ جاتىر، دەپ حابارلايدى Baq.kz اقپارات اگەنتتىگى قازاقپاراتسايتىنا سىلتەمە جاساپ
سوت بارىسىندا «سەزام» قورىنىڭ ديرەكتورى قايرات بايانوۆ ەرلان بىلالوۆكە اقشانى قالاي بەرگەنى تۋرالى ايتىپ بەردى. «سەزام» ديرەكتورى العاش رەت سوتتالۋشىمەن 2017 جىلدىڭ قازانىندا كەزدەسكەن. سول كەزدەسۋ بارىسىندا سىياقى كولەمى تۋرالى ايتىلعان. بايانوۆ بىلالوۆكە 1,5 ملن تەڭگە كولەمىندە اقشانى ءبولىپ-ءبولىپ بەرۋى ءتيىس بولعان.
«سوما تۋرالى سويلەسپەدىك. ول (ەرلان ءبىلالوۆ - اۆت.) 1,5 ملن تەڭگەنى مەڭزەدى. جارايدى، كورەيىك دەدىم»، - دەدى بايانوۆ.
كەيىنىرەك بايانوۆ تەرگەۋ ورىندارىمەن بىرگە جۇمىس جاساي باستاعان. العاشقى 600 مىڭ تەڭگەنى بايانوۆ كونۆەرتكە سالىپ 3 قاڭتارعا دەيىن بەرگەن. بىراق ءبىلالوۆ اقشانى تەزىرەك بەرۋىن سۇراپ، قايتا-قايتا مازالاعان. قالعان 900 مىڭ تەڭگەنى بايانوۆ 4 قاڭتاردا بەرۋى ءتيىس بولدى. كۋاگەر بايانوۆ 600 مىڭ تەڭگەنى قايتارۋعا نيەتتى ەكەنىن ايتتى.
ەسكە سالايىق، 5 قاڭتاردا قر ەڭبەك سىڭىرگەن قايراتكەرى، اكتەر، مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترى باسشىسى ەرلان ءبىلالوۆ 1,5 ميلليون تەڭگە پارامەن ۇستالعانى حابارلانعان بولاتىن. كىناسىن تولىق مويىنداۋىنا بايلانىستى ەرلان ءبىلالوۆ قاماۋعا الىنبادى. وسىدان كەيىن 9 قاڭتاردا اۋەزوۆ تەاترى ديرەكتورى مىندەتىن اتقارۋشى تاعايىندالعان. ال 17 قاڭتاردا ەرلان ءبىلالوۆتىڭ ءىسى سوتقا تۇسكەن ەدى
baq.kz
