ميللياردەر، Tesla كومپانياسىنىڭ باس اتقارۋشى ديرەكتورى يلون ماسكتىڭ Twitter اككاۋنتىندا ءبىراز شىتىرمان وقيعالار بولدى.
2018 جىلى ماسك "Tesla-نى جەكەمەنشىككە الۋدى قاراستىرىپ جاتىرمىن" دەگەن تۆيتىنەن كەيىن وعان اقش-تىڭ باعالى قاعازدار جانە بيرجالار جونىندەگى كوميسسياسى ايىپ تاعىپ، 20 ميلليون دوللار ايىپپۇل سالعان بولاتىن.
2020 جىلدىڭ ساۋىرىندەگى لوكداۋن كەزىندە، ماسك Twitter-دە ء"دال قازىر امەريكانى ەركىن جىبەر" دەپ جازىپ، تاعى دا داۋ تۋدىرعان.
كەلەسى ايىندا ماسك "مەن بارلىق دەرلىك فيزيكالىق مەنشىكتەرىمدى ساتامىن. ەشقانداي ءۇي بولمايدى" دەگەن.
62 ميلليون جازىلۋشىسى بار ماسك تاعى دا ءبىر قىزىقتى تۆيت جاريالادى.
تۆيت اعىلشىن تىلىندە "ادامزات" دەگەن سوزدەن باستالعان. الايدا ءبىر عانا اعىلشىن سوزىنەن كەيىن قىتاي تىلىندەگى ەجەلگى ولەڭ جولدارى جازىلعان.
ولەڭدى ءبىزدىڭ زامانىمىزدىڭ 220-280 جىلدار ارالىعىنداعى قىتايدىڭ ءۇش مەملەكەتكە بولىنگەن كەزەڭىندە ءومىر سۇرگەن اقىن تساو چجي جازعان. دەرەكتەرگە سايكەس، تساو چجي بۇل سوزدەردى اعاسىمەن اراداعى داۋدى شەشۋ ءۇشىن داۋىستاپ ايتقان.
دەرەكتەر بويىنشا، يمپەراتور تساو پي ءىنىسى تساو ءچجيدىڭ بيلىكتى قۇلاتپاق نيەتى بار دەپ كۇدىكتەنىپ، ونىڭ ادالدىعىن انىقتاۋ ءۇشىن اقىندى شاقىرادى. يمپەراتور اقىننىڭ كىناسىزدىگىنە كوز جەتكىزۋ ءۇشىن ودان جەتى قادام اتتاماي تۇرىپ ولەڭ جازۋدى تالاپ ەتەدى.
"جەتى قادام ءتورت تارماق" دەگەن ولەڭ يمپەراتوردىڭ وسى سىناعىنان تۋىنداعان. سودان كەيىن يمپەراتور ەموتسياسىن جەڭىپ، ىنىسىنە كۇدىگى سەيىلگەن-ءدى.
ولەڭنىڭ ءتورت تارماقتى نۇسقاسىنىڭ (ماسك بولىسكەن) اۋدارماسى كەلەسىدەي:
"بۇرشاق ساباعىنىڭ جالىنىندا بۇرشاقتار قۋىرىلدى،
قازاننىڭ ىشىنەن (بۇرشاقتار) اشۋلاندى:
ء"بىز ءبىر تامىردا وستىك -
ءبىزدى وتتا پىسىرۋگە نەگە اسىعاسىڭ؟".
(Humankind
煮豆燃豆萁
豆在釜中泣
本是同根生
相煎何太急)
بۇل قىتاي ادەبي شىعارماسى ادەتتە باۋىرلاستار اراسىنداعى قارىم-قاتىناستى رەتتەيتىن جانە ۇساق كەلىسپەۋشىلىكتەرگە جاۋاپ رەتىندە ء"بىر-بىرىنە زيان كەلتىرۋ" دەگەن يدەياعا قارسى تۇراتىن مەتافورا رەتىندە تۇسىندىرىلەدى.
ماسكتىڭ ءتۆيتى قىتاي مەن اقش الەۋمەتتىك جەلىسىندە قىزۋ تالقىعا ءتۇستى. ولەڭ جولدارىنا تالداۋ جاساعان، ونىڭ كىمگە باعىتتالعانىن تۇسىندىرگەن ءار ءتۇرلى تەوريالار پايدا بولدى.
الەۋمەتتىك جەلى قولدانۋشىلارى مەن الەمدىك باق "ماسك ايتىپ وتىرعان مەتافورالىق اعايىندىلار كىم بولۋى مۇمكىن؟", "بۇكىل ادامزات؟", "كليماتتىڭ وزگەرۋىنە قارسى كۇرەس پە؟", "ماسك پەن عارىشقا قۇمار ميللياردەر دجەفف بەزوس پە؟", "قىتاي مەن امەريكا قۇراما شتاتتارى ما؟" دەگەن سۇراقتار قويعان.
ء"بىزدىڭ باتىستىق دوستارىمىز ءۇشىن. بۇل ءۇش پاتشالىق رومانسىنداعى ولەڭ. ءبىز (وسى ولەڭ جولدارى ارقىلى) ءبىر-بىرىمىزبەن سوعىسپاۋ كەرەكتىگىن بەينەلەيمىز" دەپ جازادى OKEX باس ديرەكتورى دجەي حاو Twitter-دە. ول ماسكتىڭ ءتۆيتى شىعىس پەن باتىستى مەڭزەگەنىن، قاقتىعىستى بولدىرماۋ كەرەك ەكەنىن ايتتى دەپ سەنەدى.
"ول تايۆان ماسەلەسىن ايتىپ جاتىر. ونىڭ كوزقاراسى بىلىنۋدە" دەلىنگەن ماسكتىڭ Weibo جازباسىنىڭ استىنداعى تانىمال پىكىردە.
"مۇنىڭ سەبەبى دەموكراتتار بايلارعا سالىق سالعىسى كەلەدى، ونىڭ ىشىندە ماسكتىڭ 50 ميلليارد اقش دوللارى جانە بەزوستىڭ 44 ميلليارد دوللارى بار" دەپ جازادى تاعى ءبىرى.
ماسكتىڭ پوەتيكالىق ءتۆيتىنىڭ استىنداعى كەيبىر تۇسىنىكتەمەلەردە "Shiba Inu جانە Dogecoin كريپتوۆاليۋتالارىنا سىلتەمە جاسالۋى مۇمكىن" ەكەندىگى ايتىلاعان:
العاشقى كەزدە ماسك Dogecoin كريپتوۆاليۋتاسىن قولداعان جانە ول جۇزدەگەن ەسە قىمباتتاعان. كەيىنىرەك وعان باسەكەلەس رەتىندە Shiba Inu كريپتوۆاليۋتاسى شىعىپ، ونىڭ دا باعاسى كورنەكتى كوتەرىلدى. ءتىپتى جاقىندا Shiba Inu-دىڭ نارىقتىق قۇنى Dogecoin-نان اسىپ ءتۇستى. "بۇل ءتيىستى مونەتالاردى جاقتاۋشىلار اراسىندا شيەلەنىس تۋدىردى" دەپ حابارلايدى Fortune.
ال قىتايدىڭ "سينحۋا" مەملەكەتتىك اگەنتتىگىنە قاراستى "Reference News" باسىلىمى ماسكتىڭ جازباسىنا باسقاشا تالداۋ جاسايدى. باسىلىم ءتۆيتتى بۇۇ دۇنيەجۇزىلىك ازىق-تۇلىك باعدارلاماسىنىڭ اتقارۋشى ديرەكتورىنىڭ قايىرىمدىلىق تۋرالى ماسكپەن قىزۋ پىكىر الماسۋىنا بايلانىستىرادى.
Tesla كومپانياسى ەجەلگى قىتاي ولەڭى تۋرالى تۆيتكە تۇسىنىكتەمە بەرۋ سۇراقتارىنا جاۋاپ بەرمەدى.
تالعار قىرىقباي،
دەرەككوز: Qamshy.kz
