بانكتەر مەن كوللەكتورلارعا بورىشكەرلەردەن نەسيە بويىنشا كەپىلگە قويىلعان مۇلىكتەن ارتىق مۇلىك الۋعا تىيىم سالۋ كەرەك دەپ «اق جول» پارتياسىنىڭ دەپۋتاتتارى ۇسىندى، دەپ حابارلايدى "ادىرنا" ۇلتتىق پورتالى.
2021 جىل، 3 قاراشادا ماجىلىستە بيزنەستىڭ جاڭا رەتتەۋشى ساياساتى تۋرالى زاڭ جوباسىن تالقىلاۋ كەزىندە بانكتەر مەن كوللەكتورلارعا بورىشكەرلەردەن نەسيە بويىنشا كەپىلگە قويىلعان مۇلىكتەن ارتىق مۇلىك الۋعا تىيىم سالۋ كەرەكتىگى تۋرالى دەموكراتتاردىڭ كوشباسشىسى ازات پەرۋاشەۆ مالىمدەدى.
«پاندەميا جانە ونىڭ ەكونوميكاعا الىپ كەلگەن داعدارىسى كاسىپكەرلەر مەن ازاماتتاردىڭ تولەم قابىلەتتىلىگىن قالپىنا كەلتىرۋ پروبلەماسىن ەداۋىر ۋشىقتىردى. بۇگىندە مىڭداعان كاسىپكەرلەر مەن ازاماتتار بانك نەسيەلەرىن وتەي الماي ءجۇر.
بۇل رەتتە جوعارى پايىزداردىڭ جەتكىلىكسىزدىگىنە بايلانىستى بانكتەر الدىنداعى قارىزدار شارىقتاپ ءوسىپ جاتىر»، - دەپ اتاپ ءوتتى دەپۋتات.
ول مۇنداي دارمەنسىز قارىز الۋشىلاردان بانكتەر كەپىل مۇلكىن تاركىلەپ، تومەندەتىلگەن باعامەن ساتاتىنىن اتاپ ءوتتى. قۇن ايىرماشىلىعى سول بورىشكەردىڭ وزىنە قايتا «جۇكتەلەدى» جانە ونىڭ سوماسى بورىشكەرلەردىڭ ۇيلەرى مەن بيزنەستەرىن الىپ قويعاننان كەيىن دە نەگىزگى قارىزدان اسىپ كەتىپ جاتادى.
«قازىر ءبىز تاۋەلسىزدىكتىڭ 30 جىلدىعىنا راقىمشىلىق جاساۋ تۋرالى زاڭ قابىلدادىق. بۇل ادامگەرشىلىك تۇرعىسىنان ماڭىزدى شارا. بىراق «اق جول» فراكتسياسى بۇل زاڭمەن سوتتالعانداردى عانا ەمەس، سونداي-اق، قاراپايىم حالىقتى قامتۋ قاجەت دەپ سانايدى. قاراپايىم ادامدار دا، كاسىپكەرلەر دە ادامگەرشىلىككە مۇقتاج»، - دەدى پەرۋاشەۆ.
«اق جول» فراكتسياسى نەسيەنى وتەي الماي، كەپىلزات بەرگەن، سوندا دا بانكتەر مەن كوللەكتورلارعا تاۋەلدى بولىپ وتىرعان كاسىپكەرلەر مەن ازاماتتاردى قورعاۋ قاجەت دەپ سانايدى.
«جاڭا رەتتەۋ ساياساتى اياسىندا بانكتەر مەن كوللەكتورلارعا كاسىپكەرلەر مەن ازاماتتاردىڭ قالعان مۇلكى مەن كىرىستەرىنە، ەگەر ولار نەسيە كەپىلىنە قويىلماسا، ودان ءارى ءوندىرىپ الۋعا (الىپ قويىلعان كەپىلدىكتەردەن باسقا) تىيىم سالۋدى ۇسىنامىز»، - دەپ مالىمدەدى ول.
بۇل رەتتە «اق جول» دەموكراتيالىق پارتياسىنىڭ باسشىسى كەپىلگە قويىلعان مۇلىكتىڭ «كەز-كەلگەن جاعدايدا باعالاۋشىلار مەن سوتتار تاراپىنان ناقتى قۇنىنان 1,5-2 ەسە ارزانعا باعالاناتىنىن» اتاپ ءوتىپ، بەس ادامعا وق اتقان الماتىداعى بورىشكەردىڭ قايعىلى وقيعاسىن مىسالعا كەلتىردى.
"ادىرنا" ۇلتتىق پورتالى
