Meta (بۇرىنعى – Facebook) كومپانياسىنىڭ قىتاي، ورتالىق ازيا جانە موڭعولياداعى جۇرتشىلىقپەن بايلانىس جونىندەگى وڭىرلىك ديرەكتورى دجوردج چەن قازاقستاننىڭ ورتالىق ازيادا CRS كومپانياسىنىڭ ىشكى جۇيەسىنە قول جەتكىزگەن العاشقى ەل بولعانىن ءمالىم ەتتى، دەپ حابارلايدى «ادىرنا» ءتىلشىسى قازاقپارات-قا سىلتەمە جاساپ.
«Meta-نىڭ بۇكىل الەم ۇكىمەتتەرى جەرگىلىكتى زاڭنامانى بۇزاتىن كونتەنت تۋرالى حابارلاي الاتىن ارنايى ونلاين-ارناسى (Content Reporting System, CRS), بار. قازاقستان سول CRS جۇيەسىنىڭ ءبىر بولىگىنە اينالدى»، - دەپ جازدى دجورجد چەن Facebook-تەگى رەسمي پاراقشاسىندا.
بۇعان دەيىن «قازاقپارات» حاا قازاقستاننىڭ اقپارات جانە قوعامدىق دامۋ مينيسترلىگى مەن Facebook ينتەرنەتتەگى بالالاردىڭ قۇقىقتارىن قورعاۋ ءۇشىن زياندى كونتەنتكە قارسى ءىس-قيمىل ماسەلەلەرى بويىنشا تىعىز ىنتىماقتاستىق ورناتۋعا ۋاعدالاسقانىن حابارلاعان بولاتىن. قازاقستان ۇكىمەتىنە Facebook تاراپىنان قاۋىپسىزدىكتى جانە اقپاراتتىق كەڭىستىكتى ارتتىرۋ ماسەلەسىن شەشۋگە كومەك كورسەتۋ ءۇشىن ىشكى «كونتەنت تۋرالى حابارلاما جۇيەسىنە (Content Reporting System (CRS) تىكەلەي كىرەتىن مۇمكىندىك بەرىلدى. سونىڭ ارقاسىندا اقپارات سالاسىنا جاۋاپتى مينيسترلىك Facebook-كە جاھاندىق ساياساتتىڭ دا، قازاقستان رەسپۋبليكاسىنىڭ ۇلتتىق زاڭناماسىنىڭ دا بۇزۋشىلىقتارى بار كونتەنت تۋرالى جەدەل حابارلاۋعا مۇمكىندىك بەرەدى.
28 قازاندا Facebook كومانداسى مينيسترلىكتىڭ ماماندارىنا «كونتەنت تۋرالى حابارلاما جۇيەسىمەن» جۇمىس ىستەۋ، سونداي-اق Facebook-ءتىڭ كونتەنت ساياساتى جانە قوعامداستىق ستاندارتتارى بويىنشا ترەنينگ وتكىزدى. قاراشا ايىنىڭ باسىنان باستاپ مينيسترلىك اتالمىش جۇيەدە جۇمىس ىستەي باستايدى. ەكى تاراپ تا ءوزارا ءىس-قيمىلدىڭ تۇراقتى تەتىگىن، ونىڭ ىشىندە مينيسترلىكپەن ءتۇرلى اسپەكتىلەر بويىنشا تىعىز جۇمىس ىستەيتىن Facebook وڭىرلىك وفيسىنەن ۋاكىلەتتى وكىلدى انىقتاۋدى كوزدەيتىن تۇراقتى تەتىگىن بەلگىلەۋ تۋرالى كەلىسىمگە كەلدى. «كونتەنت تۋرالى حابارلاما جۇيەسى (CRS) دەگەنىمىز – «Meta» كومپانياسىنىڭ «Facebook» جانە «Instagram» پلاتفورمالارىنداعى جاھاندىق كونتەنت ساياساتىن دا، جۇيەگە رۇقساتى بار مەملەكەتتەردىڭ ۇلتتىق زاڭناما تالاپتارىن دا بۇزاتىن كونتەنت تۋرالى حابارلاما جىبەرۋگە پايدالانىلاتىن ىشكى اقپاراتتىق جۇيەسى. CRS جۇيەسى الەم مەملەكەتتەرىنىڭ، بۇدان بىلاي قازاقستان رەسپۋبليكاسىنىڭ دا ۋاكىلەتتى ورگاندارى ءۇشىن «Meta» («Facebook») كومپانياسىنىڭ كونتەنتتىك ساياساتقا جاۋاپ بەرەتىن حالىقارالىق كومانداسىمەن تىكەلەي بايلانىس ارناسىن ۇسىنادى. CRS قولدانۋ زياندى كونتەنتتى جويۋ بويىنشا قابىلدانىپ جاتقان شارالاردىڭ جەدەلدىگىن جانە جالپى «Facebook» پەن «Instagram» پلاتفورمالارىندا زاڭناماعا قايشى كەلەتىن ماتەريالداردىڭ تارالۋىنا قارسى ءىس-قيمىل بويىنشا جۇرگىزىلىپ جاتقان جۇمىستىڭ تيىمدىلىگىن ارتتىرۋعا مۇمكىندىك بەرەدى.
«ادىرنا» ۇلتتىق پورتالى
