امەريكاندىق Tesla جانە SpaceX كومپانيالارىنىڭ نەگىزىن سالۋشى جانە الەمدەگى ەڭ باي ادام يلون ماسك ادامزاتتى اشتىقتان قۇتقارۋ ءۇشىن اقشاسىنىڭ ءبىر بولىگىن جۇمساۋعا دايىن ەكەنىن ايتتى، دەپ حابارلايدى "ادىرنا" ۇلتتىق پورتالى.
بۇعان دەيىن بۇۇ-نىڭ دۇنيەجۇزىلىك ازىق-تۇلىك باعدارلاماسىنىڭ (ۇقج) اتقارۋشى ديرەكتورى دەۆيد بيسلي ماسكتى «اپاتتىڭ» الدىن الۋ ءۇشىن اشتىقپەن كۇرەسۋ ءۇشىن قاراجات بەرۋگە شاقىرعان. CNN حابارلاعانداي، ادامداردى اشتىقتان قۇتقارۋ ءۇشىن يلون ماسك داۋلەتىنىڭ تەك 2% - ى قاجەت، ول قازىرگى ۋاقىتتا شامامەن 289 ميلليارد دوللارعا جەتەدى.
- ەگەر ۇقج وسى تۆيتتەر جەلىسىندە 6 ميلليارد دوللار الەمدىك اشتىق ماسەلەسىن قالاي شەشە الاتىنىن تۇسىندىرە السا، مەن Tesla اكتسيالارىن قازىر ساتۋعا جانە ونى شەشۋگە دايىنمىن. بىراق حالىق اقشانىڭ قالاي جۇمسالعانىن ناقتى كورە الاتىنداي قارجىلىق ەسەپ اشىق بولۋى كەرەك، دەپ جازدى ميللياردەر Twitter-دە.
ەستەرىڭىزگە سالا كەتەيىك، بۇعان دەيىن ماسك اقش-تاعى "ميللياردەرلەرگە سالىناتىن سالىق" ۇسىنىسىن سىنعا الىپ، ءوزىنىڭ اقشاسىن ادامزاتتى مارسقا جەتكىزۋگە جۇمساۋدى جوسپارلاپ وتىرعانىن ايتقان بولاتىن.
"ادىرنا" ۇلتتىق پورتالى
