وزبەكستان تمد ايماعىندا "ورىس ءتىلى جىلىن" بەكىتىپ، ونى ۇلتارالىق ءتىل رەتىندە اتاپ ءوتۋ بويىنشا ۇسىنىستى قولدادى. ول تۋرالى "روسسيا-24" ارناسىنا وزبەكستاننىڭ ءسىم باسشىسى ابدۋلازيز كاميلوۆ سۇحبات بارىسىندا مالىمدەدى.
مينيستر وزبەكستان مەن رەسەي اراسىندا قاتىناسقا بارىنشا ءمان بەرەتىنىن اتاپ وتكەن. ونىڭ ويىنشا وزبەكستاندا رەسەيدى قولداۋ بارىنشا ءجۇرىپ جاتىر. مىسال رەتىندە رەسەيدىڭ 15 جوو-نىڭ وزبەكستاندا جۇمىس ىستەپ تۇرعانىن، ورىس ءتىلىن وقىتۋ ورتالىقتارى بارىن، مادەني وشاقتاردىڭ سانىنىڭ ارتقانىن كەلتىردى.
ول رەسەي پرەزيدەنتى ۆلاديمير ءپۋتيننىڭ تمد ەلدەرىنىڭ باسشىلارىنىڭ كەڭەسىندە تمد ايماعى بويىنشا "ورىس ءتىلى جىلىن وتكىزۋ" ۇسىنىسىن قولداعانىن دا ايتا كەتتى.
"بۇل تۇرعىدان وزبەكستاننىڭ تاريحي تاجىريبەسى كوپ. مىسالى 70-جىلدارى تاشكەنتتە عىلىمي جانە مادەني ورتانى شاقىرىپ، ۇلكەن "ورىس ءتىلى - دوستىق پەن حالىقتار ارىپتەستىگى ءتىلى" اتتى ماسشتابتى فورۋم ءوتتى. ياعني بىزدە تاجىريبە، وزىندىك ءادىس پەن اتالمىش باعىتتاعى شارالاردى وتكىزۋ كورىنىستەرى بار. ءبىز بۇل ۇسىنىستى قۋانا ىسكە اسىراتىن بولامىز", - دەدى مينيستر.
"ادىرنا" ۇلتتىق پورتالى
