كاسپي قۇبىر كونسورتسيۋمى داۋىلعا بايلانىستى تەڭىز تەرمينالىندا مۇناي تيەۋ مەن ونى قابىلداۋدى ۋاقىتشا توقتاتتى، دەپ حابارلايدى «ادىرنا» ءتىلشىسى.
«29 جەلتوقساندا كقك تەڭىز تەرمينالىنىڭ وپەراتسيالىق ايماعىنداعى قولايسىز اۋا رايى جاعدايلارىنا بايلانىستى كونسورتسيۋم اۋا رايى قالىپقا كەلىپ، داۋىلدى ەسكەرتۋلەر الىنعانعا دەيىن مۇنايدى تيەۋ جۇمىستارىن توقتاتۋعا ءماجبۇر بولدى. سونداي-اق شيكىزاتتى ساقتاۋ قۋاتتارىنىڭ تولىپ كەتۋىنە بايلانىستى مۇناي قابىلداۋ دا توقتاتىلدى»،- دەلىنگەن حابارلامادا.
مۇناي قۇبىرى جۇمىسىنىڭ تۇراقتى تۇردە قايتا جاندانۋى جانە جۇكتەمەلەردىڭ قالىپتى رەجيمگە ورالۋى تۋرالى قوسىمشا حابارلاناتىن بولادى.
ەسكە سالايىق، 29 قاراشادا نوۆوروسسيسك پورتى اۋدانىندا كقك-نىڭ تەڭىز ينفراقۇرىلىم نىساندارىنا ەكيپاجى جوق ءجۇزۋ قۇرالدارى ارقىلى شابۋىل جاسالعان بولاتىن. شابۋىل سالدارىنان تەڭىزدەگى قاشىقتاعى ايلاق قوندىرعىسى ۆپۋ-2 (قالقىمالى تيەۋ قۇرىلعىسى) ايتارلىقتاي زاقىمدالعان.
قازىرگى تاڭدا قازاقستان شابۋىلدان كەيىنگى شىعىن كولەمىن ەسەپتەپ جاتىر.
