ەلورداداعى «استانا» كونتسەرت زالىندا حالىق ءارتىسى، ءانشى-كومپوزيتور ەسكەندىر حاسانعاليەۆتى ەسكە الۋعا ارنالعان «ساعىندىم سەنى» اتتى كونتسەرت ءوتتى، دەپ حابارلايدى "ادىرنا" ۇلتتىق پورتالى.
شارا مەملەكەتتىك اكادەميالىق فيلارمونياسىنىڭ ۇرمەلى اسپاپتار وركەسترىنىڭ ءححى كونتسەرتتىك ماۋسىمىنىڭ اشىلۋىنا ورايلاستىرىلدى. بۇل تۋرالى نۇر-سۇلتان اكىمدىگىنىڭ رەسمي سايتىندا ەركەعالي راحماديەۆا حابارلايدى.
كونتسەرت ەلوردا اكىمدىگىنىڭ قولداۋىمەن ۇيىمداستىرىلدى.
قازاقتىڭ بەلگىلى ءانشى-كومپوزيتورى، مەملەكەتتىك سىيلىقتىڭ لاۋرەاتى، قازاق كسر حالىق ءارتىسىن ەسكە الۋعا ارنالعان سازدى كەشتە ونەرپازدار ەسكەندىر حاسانعاليەۆتىڭ رەپەرتۋارىنداعى اندەردى ورىندادى.
ونىڭ جارى داريكو حاسانعاليەۆا مەن ۇلى ءبىرجان حاسانعاليەۆ كەشتىڭ قۇرمەتتى قوناعى بولدى.
وسىنداي جارقىن دا شىنايى كونتسەرتتى ۇيىمداستىرعان ەلوردا اكىمدىگى ەسكەندىر حاسانعاليەۆتىڭ ەڭبەگىن ارداقتاپ كەلگەن بارشا جۇرتشىلىققا ەرەكشە العىسىمدى بىلدىرەمىن. ونەر مەن شىعارماشىلىقتى حالىق باعالاعاندا كورنەكتى كومپوزيتوردىڭ ەسىمى ولمەيتىنىنە سەنىمدىمىن، – دەيدى حالىق ءارتىسىنىڭ جارى داريكو حاسانعاليەۆا.
كومپوزيتور حالقىمىزدىڭ ءان ونەرىنە ۇلكەن ۇلەس قوستى. ونىڭ اۆتورلىق شىعارمالارى كوپشىلىكتىڭ سۇيىسپەنشىلىگىنە بولەندى. قازاق، ورىس، تاتار، نەمىس اقىندارىنىڭ ولەڭدەرىنە كوپتەگەن اندەر جازدى. سونداي-اق 200-گە جۋىق ءان، رومانس جانە حور شىعارمالارىن ۇسىندى. قازاق حالقىنىڭ ەسكەندىر حاسانعاليەۆكە دەگەن قۇرمەتى قاشاندا ەرەكشە.
كونتسەرتتە قازاقستان رەسپۋبليكاسىنىڭ ەڭبەك سىڭىرگەن ءارتىسى مايرا ءىلياسوۆا، قازاقستاننىڭ ەڭبەك سىڭىرگەن قايراتكەرلەرى سۆەتلانا ايتباەۆا، سۇندەت بايعوجين، التىناي جوراباەۆا، مارجان اراپباەۆا، ارايلىم راحىمقىزى، حالىقارالىق بايقاۋلاردىڭ لاۋرەاتتارى ايدىن جۇماباەۆ، نۇربول بالاماپانوۆ، پارابات وتارازانوۆ قۇسنادينوۆ نۇرولاق حاجەناندى، مۇربەك ماجەناندى، بالاپانوۆ، باقداۋلەت جاقىپوۆ، ارۋجان قويشىقارا جانە «الەم» ەسترادالىق بي ءانسامبلى، ۇلتتىق ۇلاننىڭ «ورمەت» روتاسى ونەر كورسەتتى.
ونەرپازدار تالانتتى سازگەردىڭ «اتامەكەن»، «ەسكىرمەگەن ماحاببات»، «ادەمى-اۋ»، «تۋعان جەر»، «ەلىم ەركەم» اندەرى حالىق جادىندا ماڭگىلىك ساقتالاتىنىن اتاپ ءوتتى.
شارا بارلىق سانيتارلىق نورمالار مەن كارانتيندىك تالاپتاردى ساقتاي وتىرىپ وتكىزىلدى.
"ادىرنا" ۇلتتىق پورتالى
