تۇركيانىڭ باس قالاسى انكارادا XVI انكارا كىتاپ جارمەڭكەسى اشىلدى. بۇل جولعى كىتاپ جارمەڭكەسىنە قازاقستان «قوناق ەل» رەتىندە قاتىستىپ جاتىر دەپ حابارلايدى "ادىرنا" ۇلتتىق پورتالى.
ءىس-شارانىڭ سالتاناتتى اشىلۋىنا تۇركيا ۇلى ۇلتتىق ءماجىلىسىنىڭ توراعاسى مۇستافا شەنتوپ، قازاقستان ەلشىسى ابزال ساپاربەكۇلى، تۇركيا ۇلى ۇلتتىق ءماجىلىسىنىڭ دەپۋتاتى، تۇركيا – قازاقستان پارلامەنتارالىق دوستىق توبىنىڭ توراعاسى مەحمەت الي جەۆحەري، كورمەنىڭ ۇيىمداستىرۋشى «Eylül» كورمەسىنىڭ باسقارما توراعاسى رەمزي چايىر، تۇركيا ۇلتتىق كىتاپحاناسى ديرەكتورىنىڭ ورىنباسارى الي وداباشى مەن تۇركياداعى ديپلوماتيالىق ميسسيا باسشىلارى، شەتەل ديپلوماتتارى، زيالى قاۋىم وكىلدەرى جانە قازاقستاندىق جازۋشىلار قاتىستى.
اتالعان ءىس-شارادا العاش ءسوز العان «Eylül» كورمەسىنىڭ باسقارما توراعاسى رەمزي چايىر انكارا كىتاپ جارمەڭكەسىنىڭ تۇركياداعى ەڭ ۇلكەن جارمەڭكەلەردىڭ ءبىرى بولىپ ەسەپتەلەتىنىن اتاپ ءوتتى.
مارتەبەلى شەتەلدىك اۆتور رەتىندە ارنايى شاقىرىلعان تانىمال قازاق عالىمى ءادىل احمەتوۆ تۇركيا مەن قازاقستان اراسىندا تەك ديپلوماتيالىق قاتىناستار عانا ەمەس، سونىمەن قاتار ەكونوميكالىق جانە مادەني بايلانىستاردىڭ قارقىندى دامىپ جاتقانىن اتاپ ءوتتى. وسى ايتىلعانداردىڭ ناقتى ءبىر دالەلى رەتىندە باستالىپ وتىرعان حالىقارالىق انكارا كىتاپ جارمەڭكەسىنە قازاقستاننىڭ «قۇرمەتتى قوناق» رەتىندە شاقىرىلۋىن ەرەكشە اتاۋعا بولاتىنىن ايتتى.
تۇركيا ۇلى ۇلتتىق ءماجىلىسىنىڭ توراعاسى م. شەنتوپ ءوز سوزىندە قازاقستان رەسپۋبليكاسى تاۋەلسىزدىگىنىڭ 30 جىلدىق مەرەيتويىمەن تۇركيا مەملەكەتىنىڭ جانە ءوزىنىڭ اتىنان قۇتتىقتاپ، جىلى لەبىزىن ءبىلدىردى. سونىمەن قاتار، بيىل قازاقستاننىڭ «قوناق مەملەكەت» رەتىندە اتالعان كىتاپ جارمەڭكەسىنە قاتىسۋىندا ۇلكەن ءمان جاتقانىن ايتتى. بۇل جارمەڭكەدە تۇرىك وقىرماندارى قازاق اۆتورلارىنىڭ شىعارمالارىمەن كەڭىنەن تانىسىپ، مۇنداي ءىس-شارالار ەكى ەلدىڭ مادەنيەت سالاسىنداعى بايلانىستاردى نىعايتاتىنىن اتاپ ءوتتى.
ەلشى ا. ساپاربەكۇلى كىتاپ جارمەڭكەسىنە قاتىسۋشىلاردى اشىلۋ سالتاناتىمەن قۇتتىقتاپ، جارمەڭكەنى ۇيىمداستىرۋشىلارعا ەكى حالىقتى ودان ءارى جاقىنداستىرۋعا قوسقان ناقتى ۇلەسى ءۇشىن شىنايى ريزاشىلىعىن ءبىلدىردى.
انكارانىڭ «ATO Congresium» كورمە ورتالىعىندا ءوتىپ جاتقان ءىس-شاراعا تۇركيانىڭ 300-دەن استام ءىرى باسپا ءۇيى، باسپاحانالار مەن جارناما اگەنتتىكتەرى قاتىسۋدا. ۇيىمداستىرۋىشىلار بيىلعى جارمەڭكەگە كەلۋشىلەردىڭ سانى 350 مىڭنان اسۋى ىقتيمال دەپ بولجاۋدا.
ايتا كەتەيىك، انكارا كىتاپ جارمەڭكەسى 2005 جىلدان بەرى ۇيىمداستىرىلىپ كەلەدى جانە جىلىنا ەكى رەت وتكىزىلەدى. وسى ۋاقىتقا دەيىن وعان «قوناق مەملەكەت» مارتەبەسىندە يتاليا، فرانتسيا، يران جانە رەسەي قاتىسقان.
"ادىرنا" ۇلتتىق پورتالى
