XVI Ankara kitap jármeńkesine qazaqstandyq avtorlar qatysýda

2214
Adyrna.kz Telegram

Túrkııanyń bas qalasy Ankarada XVI Ankara kitap jármeńkesi ashyldy. Bul jolǵy kitap jármeńkesine Qazaqstan «qonaq el» retinde qatystyp jatyr dep habarlaıdy "Adyrna" ulttyq portaly.

Is-sharanyń saltanatty ashylýyna Túrkııa Uly ulttyq májilisiniń Tóraǵasy Mustafa Shentop, Qazaqstan Elshisi Abzal Saparbekuly, Túrkııa Uly ulttyq májilisiniń depýtaty, Túrkııa – Qazaqstan parlamentaralyq dostyq tobynyń tóraǵasy Mehmet Alı Jevherı, kórmeniń uıymdastyrýshy «Eylül» kórmesiniń Basqarma tóraǵasy Remzı Chaıyr, Túrkııa Ulttyq kitaphanasy dırektorynyń orynbasary Alı Odabashy men Túrkııadaǵy dıplomatııalyq mıssııa basshylary, shetel dıplomattary, zııaly qaýym ókilderi jáne qazaqstandyq jazýshylar qatysty.

Atalǵan is-sharada alǵash sóz alǵan «Eylül» kórmesiniń Basqarma tóraǵasy Remzı Chaıyr Ankara kitap jármeńkesiniń Túrkııadaǵy eń úlken jármeńkelerdiń biri bolyp esepteletinin atap ótti.

Mártebeli sheteldik avtor retinde arnaıy shaqyrylǵan tanymal qazaq ǵalymy Ádil Ahmetov Túrkııa men Qazaqstan arasynda tek dıplomatııalyq qatynastar ǵana emes, sonymen qatar ekonomıkalyq jáne mádenı baılanystardyń qarqyndy damyp jatqanyn atap ótti. Osy aıtylǵandardyń naqty bir dáleli retinde bastalyp otyrǵan halyqaralyq Ankara kitap jármeńkesine Qazaqstannyń «qurmetti qonaq» retinde shaqyrylýyn erekshe ataýǵa bolatynyn aıtty.

Túrkııa Uly ulttyq májilisiniń Tóraǵasy M. Shentop óz sózinde Qazaqstan Respýblıkasy táýelsizdiginiń 30 jyldyq mereıtoıymen Túrkııa memleketiniń jáne óziniń atynan quttyqtap, jyly lebizin bildirdi. Sonymen qatar, bıyl Qazaqstannyń «Qonaq memleket» retinde atalǵan kitap jármeńkesine qatysýynda úlken mán jatqanyn aıtty. Bul jármeńkede túrik oqyrmandary qazaq avtorlarynyń shyǵarmalarymen keńinen tanysyp, mundaı is-sharalar eki eldiń mádenıet salasyndaǵy baılanystardy nyǵaıtatynyn atap ótti.

Elshi A. Saparbekuly kitap jármeńkesine qatysýshylardy ashylý saltanatymen quttyqtap, jármeńkeni uıymdastyrýshylarǵa eki halyqty odan ári jaqyndastyrýǵa qosqan naqty úlesi úshin shynaıy rızashylyǵyn bildirdi.

Ankaranyń «ATO Congresium» kórme ortalyǵynda ótip jatqan is-sharaǵa Túrkııanyń 300-den astam iri baspa úıi, baspahanalar men jarnama agenttikteri qatysýda. Uıymdastyrýyshylar bıylǵy jármeńkege kelýshilerdiń sany 350 myńnan asýy yqtımal dep boljaýda.

Aıta keteıik, Ankara kitap jármeńkesi 2005 jyldan beri uıymdastyrylyp keledi jáne jylyna eki ret ótkiziledi. Osy ýaqytqa deıin oǵan «qonaq memleket» mártebesinde Italııa, Franııa, Iran jáne Reseı qatysqan.

"Adyrna" ulttyq portaly

Pikirler