شىمكەنتتە ينفەكتسيالىق ستاتسيونارلاردا 2397 توسەك ورىن جابىلدى

1659
Adyrna.kz Telegram

وڭىرلەردە ينفەكتسيالىق توسەك-ورىنداردى قىسقارتۋ جۇمىسى جۇرگىزىلىپ جاتىر. بۇل تۋرالى ۇكىمەت وتىرىسىندا قر دەنساۋلىق ساقتاۋ ءمينيسترى الەكسەي تسوي مالىمدەدى. «25 تامىزدان بەرى الماتى، نۇر-سۇلتان، شىمكەنت قالالارىندا، اتىراۋ، قاراعاندى، تۇركىستان، ماڭعىستاۋ وبلىستارىندا كوروناۆيرۋس ينفەكتسياسىن جۇقتىرعان ناۋقاستاردى ەمدەۋگە ارنالعان ينفەكتسيالىق بولىمشە رەتىندە اشىلعان 57 نىسان جابىلدى. جالپى توسەك-ورىن قورى 12 211 توسەك-ورىنعا قىسقاردى»، - دەدى الەكسەي تسوي.

ماسەلەن، شىمكەنت قالاسىندا 2 397 ينفەكتسيالىق توسەك ورىن جابىلىپ، 5 496 توسەك-ورىن رەزەرۆكە قويىلدى. قالادا 22 تامىز-13 قىركۇيەك ارالىعىندا ينفەكتسيا جۇقتىرۋ دەرەگى تومەندەگەنىن كورۋگە بولادى. قازىر 15 ينفەكتسيالىق ستاتسيوناردا بارلىعى 2 183 ورىن بار، توسەك-ورىن تولىمدىعى 36%-دى قۇرايدى، 1391 توسەك-ورىن بوس. ينفەكتسيالىق ستاتسيوناردا 791 ناۋقاس ەمدەلۋدە، جانساقتاۋ بولىمىندە – 158 ناۋقاس ەم قابىلداۋدا. وتكەن تاۋلىكتە 217 ادام اۋرۋىنان ايىعىپ، ۇيىنە شىعارىلدى. جالپى جىل باسىنان بەرى شىمكەنتتە 32 770 ادام كۆي جۇقتىرعان. 31 708 ادام جازىلىپ شىقتى، 1157 ادام وكىنىشكە وراي قايتىس بولدى. بۇگىندە كوروناۆيرۋسقا قارسى ۆاكتسيناتسيالاۋ بويىنشا شىمكەنت 2-ورىندا تۇر. ەگۋ ناۋقانى باستالعالى بارلىعى 463  001 ادام ۆاكتسيناتسيالاندى. ونىڭ ىشىندە 387 478 ادام ۆاكتسينانىڭ ەكى كومپونەنتىن دە العان. بۇل ەكپە الۋعا بولاتىن ساناتتاعىلاردىڭ 86,1 پايىزىن قۇرايدى.

پىكىرلەر