قازاق حالقىنىڭ تاريحىنداعى داڭقتى كاسىپقوي بالۋان، كۇرەستىڭ بىرنەشە تۇرىنەن الەم چەمپيونى اتانعان تۇڭعىش قازاق الىبى – قاجىمۇقان مۇڭايتپاسوۆقا ەلوردا تورىنەن ەسكەرتكىش اشىلدى. سونىمەن قاتار قاجىمۇقان مۇڭايتپاسۇلىنىڭ 150 جىلدىعىنا وراي ەسكەرتكىش ورناتىلعان «جاس باتىر» سپورت كەشەنىنە دە «قاجىمۇقان» اتاۋى بەرىلدى، دەپ حابارلايدى «ادىرنا» ۇلتتىق پورتالىنىڭ ءتىلشىسى.
سالتاناتتى ءىس-شاراعا مادەنيەت جانە سپورت ءمينيسترى اقتوتى رايىمقۇلوۆا، نۇر-سۇلتان قالاسى اكىمىنىڭ ورىنباسارى ەرمەك قيزاتوۆ، گرەك-ريم كۇرەسىنەن ەكى دۇركىن وليمپيادا جۇلدەگەرى داۋلەت تۇرلىحانوۆ، پارلامەنت ءماجىلىسىنىڭ دەپۋتاتى باقىتبەك سماعۇل، ءانشى-كومپوزيتور جەڭىس سەيدوللاۇلى جانە ت.ب. بىرقاتار زيالى قاۋىم وكىلدەرى مەن ۇرپاقتارى قاتىستى.
ەسكەرتكىشتىڭ اشىلۋ راسىمىنە الىس-جاقىننان كەلگەن قوناقتاردىڭ جۇزىنەن بالۋان رۋحىنا دەگەن شەكسىز قۇرمەتتى بىردەن بايقاۋعا بولادى. Adyrna.kz ءتىلشىسى بىرقاتار قوعام قايراتكەرلەرىمەن تىلدەسىپ، قاجىمۇقان مۇنايتپاسۇلى بابامىزعا قاتىستى تىڭ پىكىرلەرىن ءبىلىپ قايتتى.
اقتوتى رايىمقۇلوۆا، قر مادەنيەت جانە سپورت ءمينيسترى:
«داڭقتى بالۋانىمىزدىڭ اتى دا، ەڭبەگى دە، اتاعى دا ءبىزدى ماڭگى جەتەلەيدى»
- تاۋەلسىز مەملەكەتىمىزدىڭ 30 جىلدىعىنا وراي كەرەمەت وقيعا بولىپ جاتىر. جىل باسىنان قاجىمۇقان اتامىزدىڭ 150 جىلدىعىنا ارنايى جالپىرەسپۋبليكالىق ءىس-شارالار جوسپارى اياسىندا حالىقارالىق، رەسپۋبليكالىق دەڭگەيدە بىرقاتار شارالار وتكىزىلىپ جاتىر. ەلىمىزدىڭ تۇكپىر-تۇكپىرىندە مارافوندار، دوڭگەلەك ۇستەلدەر، بىرنەشە كونفەرەنتسيالار، تۋرنيرلەر، ءار ءتۇرلى كۇش جۇلدىزدارىنىڭ، كۇرەس جۇلدىزدارىنىڭ سايىستارى بولىپ جاتىر. بۇل قاتاردا ارنايى «قاجىمۇقان» كوركەم ءفيلمىنىڭ تۇسىرىلگەنىن جانە بۇگىنگى كۇندە وسىنداي كەرەمەت ەسكەرتكىش ورناتىلعانىن ايتۋعا بولادى - دەيدى مينيستر.
سونىمەن قاتار مينيستر قاجىمۇقان مۇنايتپاسۇلىنىڭ كۇرەس الەمىندەگى تولاعاي تابىستارى قازىرگى جاستارعا ماڭگى ۇلگى بولىپ قالا بەرەتىنىن اتاپ ءوتتى.
- ارينە ەلىمىزدىڭ ءار ءتۇرلى جەرلەرىندە، ءار ءتۇرلى كەرەمەت سپورت كەشەندەرىندە، تالانتتى سپورتشىلار دايىندالىپ، كۇرەسىپ كەلە جاتقان سپورت وقۋ ورىندارىندا قاجىمۇقان اتامىزدىڭ اتى ماڭگىلىك بولادى. ويتكەنى، قازاقتىڭ اتىن بۇكىل دۇنيەجۇزىنە پاش ەتكەن، كۇرەستىڭ بىرنەشە تۇرىنەن قازاقتان شىققان تۇڭعىش دۇنيەجۇزىنىڭ جۇلدەگەرى بولعان ءبىزدىڭ قاجىمۇقان اتامىزدىڭ تاۋەلسىز ەلىمىزگە، جالپى قازاق حالقىنا دەگەن ەڭبەگى زور. قاجىمۇقان اتامىزدىڭ ەسىمى ءبىزدىڭ سپورتشىلارعا، ءبىزدىڭ جاستارعا ارقاشان دا دەمەۋ بەرىپ، ءبىزدىڭ سالاۋاتتى ءومىر سالتىن ناسيحاتتاۋدا داڭقتى بالۋانىمىزدىڭ اتى دا، ەڭبەگى دە، اتاعى دا ءبىزدى ماڭگى جەتەلەيدى ،- دەيدى اقتوتى رايىمقۇلوۆا.
باقىتبەك سماعۇل، قر پارلامەنت ءماجىلىسىنىڭ دەپۋتاتى، «قازاقستان ارداگەرلەرى» قاۋىمداستىعىنىڭ توراعاسى، رەسپۋبليكالىق «امبەباپ جەكپە-جەك فەدەراتسياسىنىڭ» پرەزيدەنتى:
«قاجىمۇقان – ۇلتتىڭ رۋحى»
- بۇگىن مىناۋ تاۋەلسىزدىكتىڭ 30-جىلدىق قارسانىڭدا الاش جۇرتىنىڭ رۋحىن بيىككە سامعاتىپ وتىرعان قاجىمۇقان بابامىزدىڭ ەسكەرتكىشىنىڭ اشىلۋىنىڭ ماڭىزى ۇرپاق ءۇشىن وتە زور. بۇگىنگى تاڭدا قاجىمۇقان كىم؟ قاجىمۇقان - ۇلتتىڭ رۋحى. سوندىقتان ارقاشان دا ەلدىككە، بىرلىككە، دوستىققا، شىمىرلىققا، تاستاي قاتتى قايسارلىققا، بارلىعىنا دا ۇلگى بولارلىق بۇكىل عۇمىرى - تۇنعان شەجىرە، تۇنعان تاريح. حالىقتار دوستىعى دەيتىن بولساق تا، سول كەزدىڭ وزىندە مىناۋ مۇحيت اسىپ، بۇكىل الەمدى بىرنەشە رەت سپورتتىڭ، كۇرەستىڭ ءار ءتۇرلى تۇرىنەن مويىنداتقان. مويىنداتىپ قانا قويماي، ءوزىنىڭ شاكىرتتەرىن دە تاربيەلەي بىلگەن وسى ءبىزدىڭ قاجىمۇقان مۇنايتپاسۇلى بولاتىن، - دەيدى ءماجىلىس دەپۋتاتى باقىتبەك سماعۇل.
قاجىمۇقان كۇرەسكە ءتۇسىپ جۇرگەندە، فرانتسياداعى مەديتسينالىق كارتوچكاسىندا ونىڭ بويىنىڭ - 186 سانتيمەتر، سالماعى 130 كەلى بولسا، پوددۋبنىي 184 سم، سالماعى 118 كەلىنىڭ اينالاسىندا بولعاندىعىن جانە ءبىزدىڭ داڭقتى بالۋاننىڭ وعان جەڭىستى قالاي سىيلاپ جىبەرگەنى، قالاي جىعىلعانى بارلىعى دا ايعاقتالاتىنىن اتاپ ءوتتى.
«قاجىمۇقانداي مۇحيت اسىپ، قازاقتىڭ رۋحىن تانىتقان، دوستىقتى شىڭداعان بىردە ءبىر تۇلعا بولعان ەمەس»
- ەشقانداي دا اڭىز اڭگىمە ەمەس. بۇكىل دەرەكتەرىمەن قامتىلعان قاجىمۇقاننىڭ تابىستى ءومىرى تەك قانا ءوزىنىڭ سول شەتەلدەردەن العان جەتىستىكتەرى مەن التىندارىنىڭ قورىمەن عانا ەمەس، سونداي-اق ءوزىنىڭ سول تسيركتە تىرناقتاپ جيناعان اقشاسىنىڭ بارلىعىن قاپاسىز قايعى حالىقتىڭ باسىنا تونگەن كەزدە ۇشاق جاساتىپ، سونى مايدانعا تابىستاعانىمەن ەڭبەگى ءبىز ءۇشىن باعالى. سوندىقتان دا، بۇگىنگى تاڭداعى ءبىزدىڭ سپورتشىلارعا بۇل كىسىنىڭ ونەگەلى ءومىرى ەرەكشە ساباق! جالپى بۇكىل تۇركى جۇرتىندا قانشاما اڭىز ايتىلسىن، تۇيە كوتەرسىن، ءپىل كوتەرسىن بىراق ءدال سول زاماندا تاپ وسى قاجىمۇقانداي مۇحيت اسىپ، قازاقتىڭ رۋحىن تانىتقان، دوستىقتى شىڭداعان بىردە ءبىر تۇلعا بولعان ەمەس، - دەيدى باقىتبەك سماعۇل.
ءسوز سوڭىندا حالىق قالاۋلىسى ۇلتتىق نامىسىمىزدى ايقىندايتىن قاجىمۇقان بابامىزعا ارنالعان ەسكەرتكىش تەك قانا كوللەدجدە، مەكتەپتە عانا ەمەس، سونداي-اق وسى نۇر-سۇلتان قالاسىنىڭ بەلگىلى سپورت كەشەندەرىنىڭ الدىندا تۇلعاسى تاۋداي 15-20 مەتر بولىپ ورناتىلۋى ءتيىس ەكەنىنە توقتالدى.
«ۇلىلىعىمىزدى ەمەس ۇلتىمىزدى، رۋىمىزدى ەمەس رۋحىمىزدى ويلايمىز دەسەك – قاجىمۇقان ناعىز قازاقتىڭ قايسار ۇلى رۋحى»
- بۇكىل الەم ۇلىق تۇتقان، بۇكىل الەم ونەگە تۇتقان ازاماتىمىزدى ەشقاشان دا ۇمىت قالدىرۋعا بولمايدى! ۇلىقتالۋى كەرەك! بابامىزدى ناسيحاتتاپ، كورسەتە ءبىلۋىمىز كەرەك. ۇساقتىقتان گورى تۇتاستىققا، ۇلت بولىپ ۇيىسامىن دەپ باۋىرىمىزعا اتالاس ەمەس باتالاستى باساتىن كەزدە، ۇلىلىعىمىزدى ەمەس ۇلتىمىزدى، رۋىمىزدى ەمەس رۋحىمىزدى ويلايمىز دەسەك - قاجىمۇقان ناعىز قازاقتىڭ قايسار ۇلى رۋحى! ءبىز سونىمەن شىڭدالۋىمىز كەرەك، - دەپ ءسوزىن اياقتادى ءماجىلىس دەپۋتاتى.
اقايدار ىسىمۇلى، جۋرناليست-زاڭگەر، «مۇقالماس» رەسپۋبليكالىق قوعامدىق بىرلەستىگىنىڭ توراعاسى:
«ەشكىمگە جەڭىلمەگەن، جاۋىرىنى جەرگە تيمەگەن كىسى»
- قاجىمۇقان قازاقتى كۇللى الەمگە تانىستىرعان العاشقى كىسى. قاجىمۇقانعا دەيىن الەم قازاق دەگەن حالىقتىڭ بار ەكەنىن بىلگەن جوق. الەمدىك ارەناعا شىعىپ جۇرگەن كەزىندە ول كىسىگە: «سەن تۇرىك بول، مۇسىلمانسىڭ عوي!» – دەگەن دە ۇسىنىس بىلدىرگەن. كەيىن كەڭەس زامانىندا «سەن وزبەك بولا سال، سەنىڭ جاعدايىڭدى جاسايمىز»، «سەن ورىس بولا سال»، دەگەندە دە، ول ەشۋاقىتتا ءوزىنىڭ ۇلتتىق نامىسىن بەرمەگەن. وتە نامىسقوي كىسى بولعان. ءوزىنىڭ زامانىندا الەمدىك چەمپيوناتتارعا قاتىسىپ، 48 التىن-كۇمىس مەدالدارىن العان. ەشكىمگە جەڭىلمەگەن، جاۋىرىنى جەرگە تيمەگەن كىسى. كۇللى قازاقتىڭ پەرزەنتى، ار-ۇياتى، نامىسى. سوندىقتان دا، قاجەكەڭ ءبىزدىڭ ۇلتتىق ماقتانىشىمىز. ءبىزدىڭ ۇلتتىق نامىسىمىزدىڭ اق تۋى دەسەك تە، ارتىق ەمەس، - دەيدى اقايدار ىسىمۇلى.
ودان ءارى قاجىمۇقان بابامىزعا ءالى كۇنگە دەيىن لايىقتى باعاسىن الا الماي كەلە جاتقانىنا قىنجىلىپ، جاستار اراسىندا داڭقتى بالۋانىمىزدى دارىپتەۋ، ناسيحاتتاۋ جاعى اقسانداپ تۇرعانىنا توقتالدى.
«ول كىسىنىڭ ەسكەرتكىشى تەك سپورت مەكتەبىنىڭ الدىندا عانا ەمەس، ەلورداداعى سپورت ارەنانىڭ الدىندا تۇرۋى ءتيىس»
- ءار ۋاقىتتا بۇل كىسىنىڭ اتىنا تۋرنيرلەر وتكىزىلەدى، بىراق دەگەنمەن ءبارىبىر جەتكىلىكسىز دەپ ويلايمىز. كەڭەس زامانىندا الماتىداعى ستاديونعا سول كىسىنىڭ اتىن بەرەيىك دەگەن ۇسىنىس بەرىلدى، بولماسا الماتىداعى سپورت ينستيتۋتىنا سول كىسىنىڭ اتىن بەرەيىك دەدىك. بىراق ولاي بولمادى، تەك وسى تسەلينوگراد قالاسىندا وبلىستىق ستاديونعا عانا سول كىسىنىڭ اتى بەرىلدى. قازىر ەندى استانا بولعان كەزدە ول كىشكەنتاي الاڭعا اينالىپ قالدى. بۇگىنگى كۇنى ول كىسىنىڭ اتىنداعى ەسكەرتكىش ءوزىنىڭ تۋعان اۋىلىندا بار، ول دا ءوزى مىنا دەمەۋشىلەردىڭ، مەتسەناتتاردىڭ قولداۋىمەن قۇيىلىپ، سول حالىقتىڭ قاراجاتىنا تۇرعىزىلدى. ەندى مىنا ەسكەرتكىشتى بيلىك ءوزى تۇرعىزىپ جاتقان كورىنەدى. دەگەنمەن ول كىسىنىڭ ەسكەرتكىشى تەك سپورت مەكتەبىنىڭ الدىندا عانا ەمەس، ەلورداداعى سپورت ارەنانىڭ الدىندا تۇرسا دا، ارتىق بولماس ەدى دەپ ويلايمىز. سەبەبى، ەلدىڭ كوپ باراتىن جەرى، ءتۇرلى حالىقارالىق جاستاردىڭ وتەتىن جەرى، بۇل كىم دەگەن كەزدە وسىنداي كىسى دەپ تانىستىراتىن لايىقتى ورنى سول ەدى دەپ ويلايمىز،- دەيدى زاڭگەر-جۋرناليست.
«ەڭبەگىن لايىقتى باعالاساق، دجەكي چان تاعى بىردەڭە-سىردەڭە دەپ جۇرمەيدى جاستار»
سونىمەن قاتار بۇل كىسىنىڭ تۋعان جەرى اقمولا وبلىسىنىڭ تسەلينوگراد اۋدانى قاجىمۇقان اۋىلى بولعاننان كەيىن اۋداننىڭ اتىن تسەلينوگراد دەمەي-اق، قاجىمۇقان اۋدانى دەپ قويسا دا، ابدەن لايىق بولار ەدى.
- ەڭبەگىن لايىقتى باعالاۋ كەرەك. قاجەكەڭ ءبىزدىڭ جاستارىمىز ءۇشىن دە، جالپى كەلەشەك ۇرپاعىمىز ءۇشىن دە ءبىزدىڭ ماقتانىشىمىز! ءبىزدى نامىسقويلىققا تاربيەلەيتىن ءبىزدىڭ ۇلى تۇلعامىز! سوندىقتان دا قاجەكەڭە قانداي قوشەمەت جاساساق تا، ول ەشۋاقىتتا ارتىق ەمەس. قاجىمۇقان اتىنداعى سپورت كەشەندەرىن، سپورت زالدارىن كوبەيتكەندە ول كىسىنىڭ اتى تانىلا بەرەدى. دجەكي چان تاعى بىردەڭە-سىردەڭە دەپ جۇرمەيدى جاستار. ووو، ءبىزدىڭ ءوزىمىزدىڭ اتامىز بار! ءوزىمىزدىڭ ۇلتتىق نامىسىمىز بار! ءوزىمىزدىڭ باتىرىمىز بار، ءبىز ەشكىمنەن كەم ەمەسپىز! ءبىزدىڭ الەم چەمپيونى بولعان ءوزىمىزدىڭ تۇلعامىز بار دەپ ماقتاناتىن بولادى. بارلىعى ناسيحاتقا بايلانىستى، - دەپ تولىقتىردى ءسوزىن اقايدار ىسىمۇلى.
جەڭىس سەيدوللاۇلى، ءانشى، كومپوزيتور، «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى:
«بالا كەزىمىزدەن قاجىمۇقان بابامىزدى بالۋان، باتىر رەتىندە تانىپ، كادىمگىدەي ەرتەگى تىڭداپ وتىرعانداي بولاتىن تۇعىنبىز»
- ءبىز بالا كەزىمىزدەن قاجىمۇقان بابامىزدى بالۋان رەتىندە، باتىر رەتىندە بىلەتىن تۇعىنبىز. مەن سوناۋ 1980 جىلدارى مۋزىكالىق ۋچيليششيگە تۇسكەن كەزدە، ەڭ ءبىرىنشى كىتاپتىڭ اۆتورى امانتاي بايتاناەۆتىڭ قاجىمۇقان تۋرالى كىتابىن سول كەزدە وقىعان ەدىم. بىزگە سول امانتاي بايتاناەۆتىڭ كلارا دەگەن قىزى قازاق ءتىلى مەن ادەبيەتتەن ساباق بەردى. سول كەزدە ول كىسى ءوزىنىڭ قاجىمۇقاننىڭ الدىندا وتىرعانىن، سونداي قىزىق ءىرى ادام ەكەنىن، قۇلاعىنىڭ جارتىسى جوق ەكەنىن، مۇرنى جىرتىلعانىن، ءبارىن-ءبارىن سول كەزدە قىزىقتىرىپ ايتىپ وتىراتىن، ءبىز كادىمگىدەي ەرتەگى تىڭداپ وتىرعانداي بولاتىن تۇعىنبىز. سوندىقتان بۇگىنگى كۇنى سول قاجىمۇقان بابامىزداي ءىزباسارلارى كوپ بولسىن، ءوسىپ-ءونسىن دەپ تىلەيمىن! بۇگىن بابامىزدىڭ مىناۋ ەسكەرتكىشىن اشايىن دەپ جاتىرمىز. وسىعان قاراپ، بالالار وزدەرىنىڭ بويىن تۇزەپ، مىقتى-مىقتى، ۇلكەن-ۇلكەن بيىكتەردەن كورىنە بەرسىن، - دەپ جىلى لەبىزىن ءبىلدىردى جەڭىس سەيدوللاۇلى.
ەرقوجا القوجاۇلى تىلەپبەردى – اقىن-زاڭگەر، قازاقستان جازۋشىلار وداعىنىڭ مۇشەسى، «مادەنيەت جانە سپورت مينيسترلىگى – ادالدىق الاڭى» جوبالىق كەڭسەسىنىڭ وكىلى:
«رۋحىمىزدى وياتىپ، جاستاردىڭ تازا، ادال ءومىر ءسۇرىپ، ادال جۇمىس ىستەۋى ءۇشىن وسى كىسىلەردى ۇلگى تۇتۋىمىز كەرەك»
- ناعىز رۋحىمىزدى وياتاتىن وسى قاجىمۇقان اتامىزعا ارناپ، وسىنداي ەسكەرتكىش قويىلىپ جاتقانىنا وتە قۋانىشتىمىز. قاجىمۇقان اتا ۇلى وتان سوعىسى كەزىندە ءوزىنىڭ جاعدايىنا قاراماي، بىردە توق، بىردە اش جۇرسە دە، ونەر كورسەتىپ ءجۇرىپ اقشا جيناپ، سامولەت ساتىپ الىپ بەرگەن. ال ول سامولەتپەن ءبىز قانشا جاۋدى جەڭدىك. سونىڭ ارقاسىندا قانشا حالىق امان قالدى. مىنە، ءبىز وسىنداي ادامداردى قولداۋىمىز كەرەك، قۇرمەتتەۋىمىز كەرەك! ارداقتاۋىمىز كەرەك! رۋحىمىزدى وياتۋمىز كەرەك! رۋحىمىزدى وياتىپ، جاستاردىڭ تازا، ادال ءومىر ءسۇرىپ، ادال جۇمىس ىستەۋى ءۇشىن وسى كىسىلەردى ۇلگى تۇتۋىمىز كەرەك. بۇگىنگى اشىلىپ جاتقان ەسكەرتكىش ءبىزدىڭ حالقىمىزدىڭ جۇرەگىندە ۇلكەن ءبىر رۋح وياتىپ، قوعامدىق وي-سانادا ۇلكەن ءبىر سىلكىنىس تۋدىردى، - دەيدى ەرقوجا تىلەپبەردى.
قاليەۆا ارداق قاستايقىزى، ق.مۇنايتپاسوۆ مەكتەبىنىڭ تاربيە جۇمىسى ديرەكتورىنىڭ ورىنباسارى:
«مەكتەبىمىزدىڭ ۇنەمدەلگەن قارجىسىنان قاجىمۇقان بابامىزعا ماڭگىلىك ەسكەرتكىش ورناتتىق»
- بۇگىن ۇلكەن مەرەكە. قاجىمۇقان بابامىزدىڭ 150-جىلدىق مەرەيتوي قارسانىڭدا ول كىسىگە ارنالعان ەسكەرتكىش اشايىن دەپ وتىرمىز جانە «جاس باتىر» سپورت كەشەنىنىڭ اتىن قاجىمۇقان بابامىزدىڭ اتىنا بەرمەكشىمىز. مەكتەبىمىزدەگى وقۋشىلار كەڭەسى، پەدوگيكالىق كەڭەستىڭ قاۋلىسى بويىنشا وسى قاجىمۇقان اتانىڭ اتىنا بەرەمىز دەپ ۇيعارىم جاسادىق. سوندىقتان بۇگىن مەكتەبىمىزدىڭ ۇنەمدەلگەن قارجىسىنان وسى قاجىمۇقان بابامىزعا ماڭگىلىك ەسكەرتكىش بولسىن، بالالارعا، كەلەشەك ەل تىزگىنىڭ ۇستايتىن ۇرپاققا پاتريوتتىق، ەلجاندىلىق تاربيە بەرۋ ماقساتىندا، ءبىز بالالارىمىزعا وسىنداي كەرەمەت مەرەكەلىك ءىس-شارا وتكىزبەكشى ويدامىز، - دەيدى ارداق قاستايقىزى.
باقىتجان قاجىمۇقانوۆ، ءانشى-كومپوزيتور، تۋعان نەمەرەسى:
«بۇگىنگى اشىلىپ وتىرعان ەسكەرتكىش حالىقتىڭ اتاما دەگەن سىي-قۇرمەتى دەپ بىلەمىن»
- بۇگىن ءبارىمىز قاجىمۇقان اتامنىڭ بۇكىل بويىمەن سوعىلعان استاناداعى ەڭ ءبىرىنشى اشىلىپ جاتقان ەسكەرتكىشىنىڭ كۋاگەرى بولىپ وتىرمىز. مەن سول قاجىمۇقان اتامنىڭ تۋعان نەمەرەسى رەتىندە وتە قاتتى قۋانىشتىمىن. جۇرەگىم ەلجىرەپ تۇر. بۇگىنگى اشىلىپ وتىرعان ەسكەرتكىش حالىقتىڭ اتاما دەگەن سىي-قۇرمەتى دەپ بىلەمىن. وسىنداي كەرەمەت شارا وتكىزگەن بارلىقتارىڭا ۇلكەن العىسىم بار، بارلىقتارىڭا ۇلكەن راقمەتىم بار!، – دەپ تۋعان نەمەرەسى ىزگى لەزىبىن ءبىلدىرىپ، ءوز ونەرىن ورتاعا پاش ەتتى.
ايتا كەتەيىك، ەسكەرتكىش قولادان سوعىلعان، جالپى بيىكتىگى 5,7 مەتر (تۇعىرى – 2,2 مەتر، ءمۇسىن 3,5 مەتر). اۆتورلارى – جالىن باۋىرقان، بولاتبەك سالاەۆ.
زارينا اشىربەك،
«ادىرنا» ۇلتتىق پورتالى
