سپورت سالاسىندا تەرىس ءدىني اعىمداردىڭ يدەولوگياسىنا قىزىعۋشىلىق تانىتاتىن كەيبىر ازاماتتار كەزدەسىپ قالادى. كاسىبي سپورتتاعى ەكسترەميستىك اعىمداردىڭ بەلەڭ الۋىن توقتاتۋ مۇمكىن بە؟ سونداي-اق ازاماتتارىڭ جەتىستىككە جەتۋىنە ونىڭ ءدىني ۇستانىمى كەرى اسەر ەتە مە؟
ءدىنتانۋشى جانداۋلەت سۇلەيمەنوۆتىڭ ايتۋىنشا، سپورتشىنىڭ ءدىني ۇستانىمى ونىڭ جەتىستىككە جەتۋىنە كەدەرگى كەلتىرمەيدى. ايتسە دە ول سپورتتا جوعارى جەتىستىككە جەتكەن ازاماتتىڭ جاستارعا ىقپالى جوعارى بولاتىنىن ەسكەرتتى.
«سپورتشى نامازحان بولا ما، جوق الدە باي نەمەسە كەدەي بولا ما، ول جاعى اسا ماڭىزدى ەمەس. ەڭ ماڭىزدىسى فيزيكالىق تۇرعىدان مىقتى بولىپ، ءوز سالاسى بويىنشا جەتىستىككە جەتۋ ەمەس پە؟ ازاماتتىڭ ءدىني ۇستانىمىنا بايلانىستى سپورتشىنىڭ جەتىستىگىنە باعا بەرۋگە بولمايدى. ايتسە دە اسىرە دىنشىلدىك پەن سپورتتى ۇشتاستىرۋ ارقىلى وزگە ازاماتتارعا ءدىني موتيۆتەگى اڭگىمەلەردى ناسيحاتتاۋ وتە قاۋىپتى. ماسەلە ءدىن ۇستانۋشى ازاماتتاردىڭ جەكە باسىندا ەمەس. سەبەبى ولاردىڭ اراسىندا سپورتتا جەتىستىككە جەتىپ جاتقان ازاماتتار وتە كوپ. سپورت ادامنىڭ ءدىني ۇستانىمىنا بايلانىستى ەمەس. وكىنىشكە قاراي ەلىمىزدەگى كەيبىر سپورتشىلاردىڭ ىشىندە دەسترۋكتيۆتى ۇستانىمداعى ازاماتتار بار. ولار ەلىمىزدىڭ اتىنان الەم چەمپيوناتى مەن وليمپيادا ويىندارى سەكىلدى ءار ءتۇرلى جارىستارعا بارادى»، – دەدى ول.
ءدىنتانۋشى جۋىردا اتىراۋ وبلىسىندا بولعان وقيعانى ەسكە الدى. ەستەرىڭىزدە بولسا، اتىراۋ وبلىسى اكىمدىگى ءانۇران ورىندالعان كەزدە ورنىنان تۇرماعان سپورتشىعا ايىپپۇل سالعان بولاتىن.«قانداي دا ءبىر ادام سپورتقا قانشا جەتىستىككە جەتسە دە، ول ەڭ الدىمەن قازاق ەلىنىڭ رامىزدەرىنە قۇرمەت كورسەتۋ كەرەك ەمەس پە؟ ال سپورتشى انۇرانعا قۇرمەت كورسەتپەگەن سوڭ اتىراۋ وبلىسى اكىمدىگى ارنايى حاتتاما تولتىرىپ، شارا قولداندى. مىڭ جەردەن مىقتى سپورتشى بولىپ، قانداي جەتىستىككە جەتپەڭىز، بىراق انۇرانعا قۇرمەتىڭىز بولماسا، كۇنى ەرتەڭ مەملەكەتىڭدى ساتىپ كەتۋىڭ ابدەن مۇمكىن. مىنە وسى جاعىنان سپورتشىنىڭ تەرىس ءدىني ۇستانىمدا بولعانى قاۋىپتى. ال ەندى ءدىنشىل ادامنىڭ سپورتتا جەتىستىككە جەتپەيدى دەگەن ءسوز قاتە. وكىنىشكە قاراي، سپورت سالاسىندا اسىرە دىنشىلدىككە بۇرىلعان ازاماتتارعا نازار اۋدارۋ كەمشىن بولىپ جاتىر. سوندىقتان دا سپورتتاعى ءدىنشىل ازاماتتارعا قانداي دا ءبىر شارا قولدانۋ جۇمىستارى جۇرمەي جاتىر»، – دەيدى ول.
تانىمال سپورتشى بولعاننان كەيىن ونى جاستاردىڭ ۇلگى تۇتاتىنى جاسىرىن ەمەس. ءدىنتانۋشى مۇنىڭ دا قاۋىپتى قۇبىلىس ەكەنىن ەسكەرتتى.
«اشىعان ايتساق سپورتتا جوعارى جەتىستىككە جەتكەن ازاماتتىڭ مىڭداعان تابىنۋشىسى بولادى. اتىن اتاپ، ءتۇسىن تۇستەمەي-اق قويايىن، كەيبىر وليمپيادا چەمپيوندارى قازىر تەرىس ءدىني ۇستانىمدا ءجۇر. ونداي ازاماتتاردى مىڭداعان جاستار كۋمير تۇتادى. سول سەبەپتى قوعامعا تانىمال ادامنىڭ تەرىس جولعا ءتۇسۋى قوعام ءۇشىن وتە قاۋىپتى. مىسالى مەن تۇزەۋ مەكەمەسىنە بارعاندا تەرروريزم، ەكسترەميزم بابى بويىنشا سوتتالعان سپورتشىلار دا كەزدەسىپ قالىپ جاتادى. ءتىپتى ولاردىڭ ىشىندە سپورتتا جاقسى ناتيجەگە جەتكەن ازاماتتار بار»، – دەدى ءدىنتانۋشى.
«ادىرنا» ۇلتتىق پورتالى
