قازاقستاننىڭ ەڭ ۇزدىك تەننيسشىسى الەكساندر بۋبليك «ماتچ تۆ»-گە بەرگەن سۇحباتىندا كارەراسىن اياقتاعان سوڭ رەسەيدە تۇرۋ جوسپارى بار ەكەنىن ايتتى، دەپ حابارلايدى “ادىرنا” ۇلتتىق پورتالى.
سپورتشى لەنينگراد وبلىسىندا تۋعان جانە سانكت-پەتەربۋرگتە ۇزاق ۋاقىت تۇرعان. 2016 جىلدان بەرى قازاقستان اتىنان جارىسقا قاتىسىپ كەلەدى، قازىرگى ۋاقىتتا الەمدىك رەيتينگتە 33-ورىندا.
قازىرگى كەزدە موناكودا تۇرىپ جاتقان بۋبليك بۇل جەردى لوگيستيكالىق تۇرعىدان ىڭعايلى دەپ سانايدى. الايدا كاسىبي مانسابىن اياقتاعان سوڭ وو رەسەيگە ورالۋدى جوسپارلاپ وتىر.
«مەن قانداي دا ءبىر كاتاكليزمدەردى ەسكەرە وتىرىپ، سانكت-پەتەربۋرگتە تۇرماقپىن. قازاقستان ءۇشىن وينايمىن جانە ونى ماقتان تۇتامىن، بىراق مەن ورىسپىن. استانا ماعان كوپ كومەكتەستى، بىراق مەن ورىس ادامى بولعاندىقتان، مەنى پەتەربۋرگكە، ونداعى ادامدارعا تارتاتىن سياقتى. ءوز حالقىمدى قاتتى جاقسى كورەمىن، ولارعا ەرەكشە ىقىلاسپەن قارايمىن. مۇمكىن، مەن بۇل قالادا ءومىر سۇرمەي تۇرا المايتىن شىعارمىن»، — دەپ مالىمدەدى بۋبليك.
سونىمەن قاتار، سپورتشى ازاماتتىعىن رەسەيدەن قازاقستانعا اۋىستىرعانى تۋرالى ەشقاشان وكىنبەيتىنىن ايتتى.
«بۇل شەشىم ماعان كومەك قاجەت بولعان كەزدە قابىلداندى. قازاقستان مەنى قولدادى، مەن فەدەراتسياعا، پرەزيدەنتكە جانە جالپى ەلگە قارىزدارمىن. قازاقستان ماعان تەزىرەك كوتەرىلەتىن مۇمكىندىك بەردى. سوندىقتان بۇعان وكىنبەۋ كەرەك. مۇنداي ويىم جوق. بىراق مەن قازاقستان ءۇشىن ارقاشان ونەر كورسەتەمىن — بۇل تالقىلانبايدى»، — دەدى بۋبليك.
سپورتشىدان رەسەي ازاماتتىعىن قايتا الۋى مۇمكىن بە دەپ سۇراعاندا: «كۇردەلى سۇراق، قازىر وسى تۋرالى ويلامايمىن. بۇل سۇراققا ازىرشە جاۋاپ جوق. تەوريالىق تۇرعىدان مۇمكىن، بىراق ازىرگە بىلمەيمىن»، — دەپ جاۋاپ بەردى بۋبليك.
