قازاقستاندىق تانىمال MMA جاۋىنگەرلەرىنىڭ ءبىرى قۋات حاميتوۆ ايىپپۇل تولەدى، دەپ حابارلايدى "ادىرنا" ۇلتتىق پورتالى Tengri Sport-قا سىلتەپ.
الەۋمەتتىك جەلىدە اتىراۋداعى جەكپە-جەك كەشىن ۇيىمداستىرۋشىلار قۋات حاميتوۆتىڭ قىزىل كابريولەتتى تىزگىندەپ كەلە جاتقان ۆيدەوسىن جاريالاعان. بەينەدە سپورتشىنىڭ قاۋىپسىزدىك بەلدىگىن تاقپاعانى تۇسىرىلگەن. كەيىن اتىراۋ پوليتسياسى اتالعان ۆيدەوعا بايلانىستى تەكسەرۋ جۇرگىزىپ، قاتىسۋشىلاردى جاۋاپكەرشىلىككە تارتتى.
«اتىراۋ وبلىستىق پوليتسيا دەپارتامەنتى الەۋمەتتىك جەلىلەردە جول قوزعالىسى ەرەجەلەرىن ورەسكەل بۇزۋ دەرەگى بەينەلەنگەن ۆيدەو تارالعانىن حابارلايدى. تەكسەرۋ ناتيجەسىندە Toyota Camry كولىگىندەگى 24 جانە 22 جاستاعى جولاۋشىلار قوزعالىس كەزىندە قاۋىپسىزدىك بەلدىگىن تاقپاعانى جانە كولىك سالونىنان دەنەسىن شىعارعانى انىقتالدى. اتالعان قۇقىقبۇزۋشىلىقتار ءۇشىن ولار اكىمشىلىك جاۋاپكەرشىلىككە تارتىلدى. سونىمەن قاتار بۇل زاڭبۇزۋشىلىقتارعا جول بەرگەن 20 جاستاعى جۇرگىزۋشى دە جاۋاپقا تارتىلدى. ال Mustang كولىگىنىڭ 38 جاستاعى جۇرگىزۋشىسى قاۋىپسىزدىك بەلدىگىن تاقپاي كولىك باسقارعانى ءۇشىن اكىمشىلىك جاۋاپكەرشىلىككە تارتىلدى»، — دەپ مالىمدەدى پوليتسيا.
سپورتشى حاميتوۆ ارەكەتىنىڭ ەشكىمگە قاۋىپ توندىرمەگەنىن ايتتى.
«حاتتاما تولتىرىپ، ايىپپۇل سالدى. بۇل جەكپە-جەك جارناماسىن ءتۇسىرۋ كەزىندەگى جۇمىس ساتتەرى ەدى. بەلدىك روليكتەگى قوزعالىسىما كەدەرگى كەلتىردى. ونىڭ ۇستىنە ءبىز ساعاتىنا 30 شاقىرىم جىلدامدىقپەن عانا كەلە جاتتىق، ومىرىمىزگە قاۋىپ بولعان جوق. سوندىقتان بەلدىكتى 10 سەكۋندقا شەشىپ تاستادىق. زاڭ بارىنە ورتاق، سوندىقتان بۇل — ءادىل جازا دەپ ويلايمىن. جالپى زاڭ بۇزعاندى ۇناتپايمىن، تەك ءتۇسىرىلىم بولعان سوڭ وسىلاي شىقتى»، — دەدى قۋات تىلشىگە بەرگەن سۇحباتىندا.
