ماڭعىستاۋلىق كاسىبي فوتوگراف سالاۋات جانىبەكۇلى جول اپاتىنا ۇشىراپ، ءبىر ايعا جۋىق ەس-ءتۇسسىز جاتقان. ول كومادا جاتقان كەزىندە تىرىلەرگە بەيمالىم الەمدى كورگەنىن ايتتى، دەپ حابارلايدى “ادىرنا” ۇلتتىق پورتالى Express Qazaqstan. سايتىنا سىلتەمە جاساپ.
سالاۋات جول اپاتىنا 8 مامىر كۇنى تۇسكەن. تاسجولعا شىعىپ كەتكەن تۇيەگە كولىك سوقتىعىسىپ، ۇزاق ۋاقىت اۋرۋحانا توسەگىنە تاڭىلدى. دارىگەرلەر ونىڭ جانىن ولىمنەن اراشالاپ قالۋ ءۇشىن بارىن سالدى.
قادىر ءتۇنىنىڭ قارساڭىندا كولىك اپاتىنا ءتۇستىم. كولىك تۇيەگە سوعىلىپتى، مەن ارتقى ورىندىعىندا وتىرعانمىن. جول اپاتى تۋرالى ەسىمدە ەشتەڭە جوق، — دەيدى سالاۋات جانىبەكۇلى.
ايتۋىنشا، اقتاۋ قالاسىنداعى وبلىستىق اۋرۋحانانىڭ جانساقتاۋ بولىمىندە 56 كۇن جاتقان. ال ونىڭ 25 كۇنى ەس-ءتۇسسىز وتكەن.
"سالاۋات سەن 25 كۇن كومادا جاتتىڭ سوندا نە كوردىڭ" دەپ مەنەن جاقىندارىم ءجيى سۇرايدى. كوزىمدى اشسام اپپاق بۇلتتىڭ ىشىندە ءجۇر ەكەنمىن. الدىمدا ۇلكەن قاقپا بولدى. سول ەسىكتىڭ الدىندا كوپ ادامدار كەزەكتە تۇر ەكەن. مەن دە كەزەككە تۇردىم، كەزەگىم جاقىنداپ ەسىكتەن كىرە بەرگەنىمدە، ەسىكتىڭ الدىندا ءبىر اقساقال ماعان، "بالام، قايدا باراسىڭ، كەيىن قايت، سەنىڭ كەزەگىڭ ءالى كەلگەن جوق" دەپ قايتاردى. مەن ەلدەن قالماي ەسىككە كىرۋگە قايتا ۇمتىلدىم، سول كەزدە الگى اقساقالدى اتا، "بالام، ساعان بۇل جەردە ورىن جوق" دەپ كەۋدەمنەن قاتتى يتەرىپ جىبەردى. مەن ەسىكتەن كىرە الماعان سوڭ جان-جاعىما قاراسام، وتە بيىك تاس قامال ەكەن. ول جەردەن ءوتۋ مۇمكىن بولمادى", —دەيدى سالاۋات جانىبەكۇلى.
ونىڭ ەسىندە بۇدان باسقا ەشتەڭە قالماعان. ايتۋىنشا، الىستان قۇران وقىلعان داۋىس ءۇزىلىپ-ءۇزىلىپ ەستىلگەندەي بولىپتى. جول اپاتىنا تۇسكەن كولىك جۇرگىزۋشىسىن دە، تۇيەنىڭ يەسىن دە كەشىرگەن سالاۋات "مەن ءۇشىن بىرەۋ قينالعانىن قالامايمىن" دەيدى.
اۋرۋحانادان شىققانىما 3 اي بولدى. اللاعا تاۋبە، قازىر جاعدايىم جاقسى. مەنىڭ امان قالعانىم ءبىرىنشى اللانىڭ شاپاعاتى، اتالاردىڭ ارۋاعى، حالىقتىڭ تىلەگى، دارىگەرلەردىڭ ەڭبەگى، ەمشىلەردىڭ ەمىنىڭ ارقاسى دەپ ويلايمىن، — دەيدى ول.
ونىڭ ماماندىعى فوتوگراف. دەنساۋلىعى قالپىنا كەلىسىمەن اقتاۋداعى ءوزىن ەمدەگەن دارىگەرلەردىڭ كۇندەلىكتى تىرشىلىگىن سۋرەتكە تۇسىرسەم دەپ ءجۇر. قاتارعا قوسىلىسىمەن كاسىبي ماماندىعىنا قايتا كىرىسپەك نيەتتە.
