Mańǵystaýlyq kásibı fotograf Salaýat Jánibekuly jol apatyna ushyrap, bir aıǵa jýyq es-tússiz jatqan. Ol komada jatqan kezinde tirilerge beımálim álemdi kórgenin aıtty, dep habarlaıdy “Adyrna” ulttyq portaly Express Qazaqstan. saıtyna silteme jasap.
Salaýat jol apatyna 8 mamyr kúni túsken. Tasjolǵa shyǵyp ketken túıege kólik soqtyǵysyp, uzaq ýaqyt aýrýhana tósegine tańyldy. Dárigerler onyń janyn ólimnen arashalap qalý úshin baryn saldy.
Qadir túniniń qarsańynda kólik apatyna tústim. Kólik túıege soǵylypty, men artqy oryndyǵynda otyrǵanmyn. Jol apaty týraly esimde eshteńe joq, — deıdi Salaýat Jánibekuly.
Aıtýynsha, Aqtaý qalasyndaǵy oblystyq aýrýhananyń jansaqtaý bóliminde 56 kún jatqan. Al onyń 25 kúni es-tússiz ótken.
"Salaýat sen 25 kún komada jattyń sonda ne kórdiń" dep menen jaqyndarym jıi suraıdy. Kózimdi ashsam appaq bulttyń ishinde júr ekenmin. Aldymda úlken qaqpa boldy. Sol esiktiń aldynda kóp adamdar kezekte tur eken. Men de kezekke turdym, kezegim jaqyndap esikten kire bergenimde, esiktiń aldynda bir aqsaqal maǵan, "Balam, qaıda barasyń, keıin qaıt, seniń kezegiń áli kelgen joq" dep qaıtardy. Men elden qalmaı esikke kirýge qaıta umtyldym, sol kezde álgi aqsaqaldy ata, "balam, saǵan bul jerde oryn joq" dep keýdemnen qatty ıterip jiberdi. Men esikten kire almaǵan soń jan-jaǵyma qarasam, óte bıik tas qamal eken. Ol jerden ótý múmkin bolmady", —deıdi Salaýat Jánibekuly.
Onyń esinde budan basqa eshteńe qalmaǵan. Aıtýynsha, alystan quran oqylǵan daýys úzilip-úzilip estilgendeı bolypty. Jol apatyna túsken kólik júrgizýshisin de, túıeniń ıesin de keshirgen Salaýat "men úshin bireý qınalǵanyn qalamaımyn" deıdi.
Aýrýhanadan shyqqanyma 3 aı boldy. Allaǵa táýbe, qazir jaǵdaıym jaqsy. Meniń aman qalǵanym birinshi Allanyń shapaǵaty, atalardyń arýaǵy, halyqtyń tilegi, dárigerlerdiń eńbegi, emshilerdiń eminiń arqasy dep oılaımyn, — deıdi ol.
Onyń mamandyǵy fotograf. Densaýlyǵy qalpyna kelisimen Aqtaýdaǵy ózin emdegen dárigerlerdiń kúndelikti tirshiligin sýretke túsirsem dep júr. Qatarǵa qosylysymen kásibı mamandyǵyna qaıta kirispek nıette.
