اقتاۋداعى ۇشاق اپاتىنان ءتىرى قالعان رەسەي ازاماتتارى ەلىنە قايتتى، دەپ حابارلايدى "ادىرنا" ۇلتتىق پورتالى.
رەسەيدىڭ تجم اۆياتسياسى اپاتتان زارداپ شەككەن رەسەيدىڭ 9 ازاماتىن اقتاۋدان ماسكەۋگە الىپ كەتتى.
مەديتسينالىق مودۋلدەرى بار رەسەي تجم يل-76 ارنايى بورت ۇشاعى اپاتتان زارداپ شەككەن رەسەي ازاماتتارىن ماسكەۋگە جەتكىزۋ ءۇشىن قازاقستانعا كەلگەن.
25 جەلتوقسان كۇنى كەشكە رەسەي ۇشاعى اقتاۋعا كەلىپ قوندى.
«رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ نۇسقاۋىنا سايكەس جانە رەسەي تجم باسشىسى الەكساندر كۋرەنكوۆتىڭ تاپسىرماسى بويىنشا ارنايى بورت ماسكەۋدەن اقتاۋعا ۇشىپ كەتتى»، - دەلىنگەن رەسەي باسىلىمدارىنىڭ بىرىندە.
قازاقستاننىڭ كولىك ءمينيسترى مارات قاراباەۆ اقتاۋدا Azerbaijan Airlines ۇشاعى اپاتقا ۇشىراعان كەزدە رەسەيدىڭ جەتى ازاماتى قازا تاپقانىن مالىمدەگەن ەدى.
«ۇشاقتا رەسەي فەدەراتسياسىنان 16 جولاۋشى بولعان. جەتى ادام قازا تاۋىپ، توعىز ادام امان قالدى»، - دەدى قاراباەۆ.
اقتاۋ اۋرۋحاناسىندا ۇشاق اپاتىنان جارالانعان 20 ناۋقاس قالعان.
«قالعان ناۋقاستار ەم قابىلداپ جاتىر. جەتى ادام – رەانيماتسيادا، 12 ادام – بولىمدە، ءبىر بالا – بالالار اۋرۋحاناسىندا» - دەدى ماڭعىستاۋ وبلىستىق اۋرۋحاناسىنىڭ ءبولىم جەتەكشىسى جانار سىدىققىزى.
