AZAL اۋە كومپانياسىنىڭ ۆيتسە-پرەزيدەنتى يلحام اميروۆ اقتاۋ ماڭىندا بولعان اۋە اپاتىنىڭ سەبەپتەرىن زەرتتەۋ بىرنەشە جىلعا سوزىلۋى مۇمكىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
اميروۆتىڭ ايتۋىنشا، اپات سەبەپتەرىن تەرەڭ تالداۋ ءۇشىن ۇشاق بولىكتەرىن، قۇرال-جابدىقتارىن جانە اگرەگاتتارىن ارنايى ينستيتۋتتاردا زەرتتەۋ قاجەت بولۋى مۇمكىن. بۇل پروتسەسس وتە ۇزاق ۋاقىت الۋى مۇمكىن. دەگەنمەن، الەمدىك تاجىريبەدە اۋە اپاتتارىن تەرگەۋگە ادەتتە ءبىر جىل ۋاقىت بولىنەدى. بىراق ناقتى قاجەتتىلىك تۋىنداعان جاعدايدا تەرگەۋ ۇزاققا سوزىلۋى مۇمكىن.
«ناتيجەلەر وتە ماڭىزدى. ولار كەيىننەن بارلىق اۆياتسيالىق ۇيىمدارعا جاريالانادى، وسىلايشا ۇقساس جاعدايلاردىڭ بولماۋىنا جول بەرىلەدى. شەكتەۋلەر جوق. ەگەر زەرتتەۋ بەلگىلى ءبىر ۇشاق بولىگىنە نەمەسە اگرەگاتقا قاتىستى جۇرگىزىلسە، ولاردى ارنايى ينستيتۋتتاردا «تازالاۋ» قاجەت بولادى، بۇل كوپ ۋاقىت الادى»، – دەدى اميروۆ media.az پورتالىنا بەرگەن سۇحباتىندا.
ەسكە سالساق، 25 جەلتوقسان 2024 جىلى باكۋ – گروزنىي رەيسىن ورىنداعان AZAL ۇشاعى اقتاۋ ماڭىندا قۇلاعان. ۇشاقتا بارلىعى 67 ادام بولعان. اپات سالدارىنان 38 ادام قازا تاۋىپ، ونىڭ ىشىندە ەكى پيلوت جانە ءبىر ەكيپاج مۇشەسى بار.
