ماسكەۋدە تمد-عا مۇشە ەلدەردىڭ قورعانىس مينيسترلەرى كەڭەسى جانىنداعى سپورت كوميتەتىنىڭ وتىرىسى قورىتىندىلاندى

3884
Adyrna.kz Telegram
ماسكەۋدە تمد-عا مۇشە ەلدەردىڭ قورعانىس مينيسترلەرى كەڭەسى جانىنداعى سپورت كوميتەتىنىڭ وتىرىسى قورىتىندىلاندى، دەپ حابارلايدى "ادىرنا" ۇلتتىق پورتالى. 
تمد-عا مۇشە مەملەكەتتەردىڭ قورعانىس مينيسترلەرى كەڭەسى جانىنداعى سپورت كوميتەتىندە قازاقستان رەسپۋبليكاسى توراعالىق ەتەدى.
وتىرىسقا سونداي-اق تمد قورعانىس مينيسترلەرى كەڭەسىنىڭ حاتشىسى گەنەرال-مايور يۋري داشكين، ارمەنيا، بەلارۋس، قازاقستان، قىرعىزستان، رەسەي، تاجىكستان، وزبەكستان قورعانىس ۆەدومستۆولارىنىڭ دەنە دايىندىعى جانە سپورت اۋقىمىنداعى اسكەري باسقارۋ ورگاندارىنىڭ باسشىلارى جانە تمد اتقارۋشى كوميتەتىنىڭ وكىلدەرى قاتىستى.
– ءىس-شارا شەڭبەرىندە تمد-عا مۇشە مەملەكەتتەردىڭ دوستاستىق ارميالارىنىڭ سپارتاكياداسى شەڭبەرىندە سپورت تۇرلەرىنەن چەمپيوناتتاردى وتكىزۋ جوسپارى، 2022 جىلى وتكىزىلەتىن عىلىمي-پراكتيكالىق كونفەرەنتسيالاردىڭ تاقىرىپتارى، ولاردى وتكىزۋ مەرزىمدەرى تالقىلاندى. بۇدان وزگە، اسكەري-قولدانبالى سپورت تۇرلەرىن دامىتۋ ماسەلەلەرىنە نازار اۋدارىلدى. تمد-عا مۇشە ەلدەردىڭ قارۋلى كۇشتەرىندە دەنە دايارلىعى مەن سپورتتى دامىتۋدىڭ نەگىزگى باعىتتارى بويىنشا قاراۋعا ۇسىنىستار ەنگىزىلدى، – دەدى تمد-عا مۇشە مەملەكەتتەردىڭ قورعانىس مينيسترلەرى كەڭەسى جانىنداعى سپورت كوميتەتىنىڭ توراعاسى ايتالاپ قۇرعامباەۆ.
ەستەرىڭىزگە سالا كەتسەك، سپورت كوميتەتى 1999 جىلعى 25 ناۋرىزدان باستاپ جۇمىس ىستەيدى. دوستاستىققا مۇشە مەملەكەتتەر قورعانىس ۆەدومستۆولارىنىڭ حالىقارالىق ىنتىماقتاستىعىن دامىتۋعا ىقپال ەتەدى.
بۇل ورگان ءوز قۇزىرەتى شەگىندە ماماندار، عىلىمي، ادىستەمەلىك جانە باسقا دا ماتەريالدار الماسۋ ماسەلەلەرىندە سپورت كوميتەتتەرىنىڭ ءوزارا ءىس-قيمىلىن، بىرلەسكەن سپورتتىق ءىس-شارالار مەن عىلىمي-زەرتتەۋ جۇمىستارىن جۇرگىزۋدى، دەنە شىنىقتىرۋ جانە سپورت اۋقىمىنداعى كەلىسىمدەر مەن باسقا دا قۇجاتتاردى ىسكە اسىرۋدى ۇيلەستىرەدى.
وتىرىس بارىسىندا تمد ەلدەرىنىڭ دوستاستىق ارميالارى اراسىندا 2022 جىلى ءىىى اسكەري-سپورتتىق ويىنداردى قازاقستاندا وتكىزۋ تالقىلاندى.
"ادىرنا" ۇلتتىق پورتالى
پىكىرلەر