اقمولا وبلىسىندا رەسەي ازاماتى ايەلى مەن بالاسىن ءولتىرىپ، جاسىرىنىپ قالعان، دەپ حابارلايدى “ادىرنا” ۇلتتىق پورتالى "Astana" ارناسىنا سىلتەمە جاساپ.
روكسانا حالدەەۆانىڭ ايتۋىنشا، وتكەن جىلدىڭ قازان ايىندا وگەي اكەسى مەن اناسى اتباسارعا بالالارىن كورىپ كەلۋ ءۇشىن اتتانعان. الايدا ءبىر تاۋلىكتەن كەيىن ەر ادام قايتا ورالىپ، اناسىنىڭ بالامەن تاعى ءبىراز بولاتىنىن ايتقان. ءدال سول كۇنى كەشكە پوليتسيا قىزمەتكەرلەرى روكساناعا اناسى ەلەنا حولدەەۆانىڭ قازا تاپقانىن حابارلاعان. قىز اناسىنىڭ ولىمىنە وگەي اكەسى كىنالى دەپ سانايدى.
"بالا اشۋلانىپ، ەشقايدا بارعىسى كەلمەي جىلاعان ەكەن. انام اتباساردا ءسىڭىلىمدى كوندىرۋ ءۇشىن قالىپتى. اكەسى رەسەيگە ىسساپارعا باراتىنىن ايتىپ، قايتا كەلدى دە، بىرنەشە كۇرتەشەسىن الىپ كەتتى. سول كۇنى تۇنگى 23:00 شاماسىندا اتباسار اۋداندىق ىشكى ىستەر ءبولىمى قىزمەتكەرلەرى انامنىڭ قايتىس بولعانىن ايتتى", - دەيدى روكسانا حولدەەۆا.
روكسانا ءسىڭىلىسىنىڭ بۇدان ەكى جىل بۇرىن قازا تاپقانىن پوليتسيا قىزمەتكەرلەرىنەن ەستىگەن. بالانىڭ ءمايىتىن 2018 جىلى اتباساردا كارىز ليۋگىنەن تاپقان. روكسانا ءسىڭىلىسى مەن اناسىن وگەي اكەسى ولتىرگەنىنە سەنىمدى ەكەنىن ايتادى.
"ساراپتاما ناتيجەسى بالانىڭ مەنىڭ ءسىڭىلىم ەكەنىن كورسەتتى. ەلەنا حالدەەۆا – 2018 جىلى قايتىس بولعان بالانىڭ اناسى. بىراق بۇل تۋرالى ەشكىم بىلمەگەن. كەيىن ەكى قىلمىستىق ءىستى بىرىكتىرىپ، رۋسلانعا حالىقارالىق ىزدەۋ جاريالاندى", - دەپ قوستى روكسانا.
كۇدىكتى رۋسلان نازميەۆ 7 قازاندا رەسەيدىڭ قازان قالاسىندا تۇتقىندالعان. بىراق اقمولا وبلىسى پوليتسيا قىزمەتكەرلەرى حالىقارالىق كەلىسىم بويىنشا رەسەي ازاماتىن قازاقستانعا ەكستراديتسيا جاساۋعا بولمايتىنىن ايتادى.
"قىلمىستىق ءىستىڭ ماتەريالدارى رەسەي فەدەراتسياسىنىڭ قۇزىرەتتى ورگاندارىنا جىبەرىلىپ، قىلمىستىق ءىستى جالعاستىرۋ سۇراعىن شەشۋ ءۇشىن قازاقستان رەسپۋبليكاسى باس پروكۋرورىنا جىبەرۋ جوسپارلانىپ وتىر", - دەدى اقمولا وبلىسى پوليتسيا دەپارتامەنتى ءباسپاسوز قىزمەتىنىڭ باسشىسى گۇلنار پينچۋك.
ەلەنا حالدەەۆانىڭ قازا تاپقانىنا 1 جىل بولعان. مارقۇمنىڭ قىزىنىڭ ايتۋىنشا، قۇقىق قورعاۋ ورگاندارىنىڭ باياۋلىعى كەسىرىنەن كۇدىكتى رەسەيدە بوستاندىققا شىعىپ كەتۋى مۇمكىن.
