بالالار وگەي اكەسىمەن بىرگە تۇراتىن وتباسىلار تەكسەرىلەدى. بۇل تۋرالى باس پروكۋراتۋراداعى ۆەدومستۆوارالىق كەڭەستە ايتىلدى، دەپ حابارلايدى «ادىرنا» ءتىلشىسى.
بۇدان بولەك بالالار جاراقاتتانۋىنىڭ سەبەپتەرى، كامەلەتكە تولماعاندار اراسىنداعى بالالار ءسۋيتسيدىنىڭ جانە قىلمىستىڭ الدىن الۋ جونىندەگى جۇمىس تالقىلاندى. سونداي-اق بالالاردىڭ قۇقىقتارىن قورعاۋ جانە وتباسىلارعا قولداۋ كورسەتۋ ءۇشىن IT-تەحنولوگيالاردى پايدالانۋدىڭ جاڭا تاسىلدەرى قاراستىرىلدى.
باس پروكۋراتۋرا قۇقىق بۇزۋشىلىقتىڭ الدىن الۋ شارالارىنىڭ تيىمدىلىگىن ارتتىرۋعا مۇمكىندىك بەرەتىن «ە-پرەۆەنتسيا» جوباسىن تانىستىردى.
«كامەلەتكە تولماعاندارعا قارسى جىنىستىق زورلىق-زومبىلىقتىڭ الدىن الۋ ءۇشىن پروكۋراتۋرا قىزمەتكەرلەرى قولايسىز وتباسىلارعا، كوپبالالى وتباسىلارعا جانە بالالار وگەي اكەسىمەن بىرگە تۇراتىن وتباسىلارعا بارادى»،—دەدى باسقارمانىڭ ءباسپاسوز قىزمەتى.
جوبا ەلوردادا جانە اقتوبە وبلىسىندا سىنالىپ جاتىر.
ال بالا قۇقىقتارى جونىندەگى ۋاكىل دينارا زاكيەۆا زورلىق-زومبىلىق، قاتىگەزدىك، بالالاردىڭ تەرەزەدەن قۇلاۋى، بالالار مەكەمەلەرىن ليتسەنزيالاۋ جانە بۋللينگ ماسەلەلەرى بويىنشا 50-دەن استام تۇزەتۋلەردى قامتيتىن بالالاردىڭ قاۋىپسىزدىگىن قامتاماسىز ەتۋگە قاتىستى زاڭنامالىق سيپاتتاعى ۇسىنىستار كەلتىردى.
مەملەكەتتىك ورگاندار بۇل ۇسىنىستاردى جۇمىس توبىنىڭ وتىرىستارىندا تالقىلايتىن بولادى.
