شالعايداعى شاعىناۋدانداردى ساپالى ەلەكتر قۋاتىمەن قامتۋ ءۇشىن 8 ستانتسيا ىسكە قوسىلدى

2592
Adyrna.kz Telegram

سايلاۋالدى باعدارلاماسى اياسىندا ازىرلەنگەن «وزگەرىستەر جولى: ءار ازاماتقا لايىقتى ءومىر!» اتتى جول كارتاسىنىڭ بەسىنشى باعىتى شىمكەنت قالاسىنداعى شالعاي ەلدى مەكەندەردى كوركەيتۋ.

ماسەلەن، شالعاي ورنالاسقان شاعىناۋدانداردى ساپالى ەلەكتر جارىعىمەن قامتاماسىز ەتۋ ماقساتىندا 2025 جىلعا دەيىن 8 قوسالقى ەلەكتر ستانتسيا ىسكە قوسىلادى.
تاۋەلسىزدىكتىڭ 30 جىلدىعىنا وراي بيىلعى جىلى ونىڭ ۇشەۋى ىسكە قوسىلسا، ونىڭ بىرەۋى تامىز ايىندا شاھاردىڭ سولتۇستىك بولىگىن ساپالى ەلەكتر قۋاتىمەن قامتيتىن «بوزارىق» قوسالقى ستانتسياسى پايدالانۋعا بەرىلگەن بولاتىن.
بۇدان بولەك، 12 ەلدىمەكەنگە اۋىز سۋ قۇبىرى تارتىلادى. وسىلايشا، اۋىز سۋمەن قامتۋ كورسەتكىشى 100 پايىزعا جەتكىزىلەدى. وسى جىلدار ىشىندە قالا تۇرعىندارى تولىعىمەن كوگىلدىر وتىنعا قوسىلسا، ساعاتىنا 250 مىڭ مەتر كۋبتى قۇرايتىن اۆتوماتتاندىرىلعان گاز تاراتۋ ستانساسى وسى جىلدىڭ قازان ايىنىڭ سوڭىندا ىسكە قوسىلادى.
سونىمەن بىرگە قالادا 84,4 شاقىرىم بولاتىن كارىز جۇيەسى سالىنادى. وسىلايشا بەس جىلدا كارىزبەن قامتۋ كورسەتكىشىن 65 پايىزعا جەتكىزۋ كوزدەلۋدە.

پىكىرلەر