قازاقستان تاريحىندا العاش رەت شىمكەنتتە ساحنالانعان قويىلىم ەندى باس قالادا

2226
Adyrna.kz Telegram

شىمكەنت قالالىق وپەرا جانە بالەت تەاترىنىڭ ۇجىمى گاسترولدىك ساپارعا اتتاندى. ونەرپازدار 2-3 قىركۇيەك كۇندەرى تاۋەلسىزدىكتىڭ 30 جىلدىعى اياسىندا نۇر-سۇلتان قالاسى «استانا وپەرا» مەملەكەتتىك وپەرا جانە بالەت تەاتر ساحناسىندا ت.جارمۇقامەتتىڭ «دومالاق انا» وپەراسىن كورەرمەن نازارىنا ۇسىنادى. شىعارماشىلىق ۇجىمدى ساپارعا شىعارىپ سالۋعا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان جانە قالالىق مادەنيەت باسقارماسىنىڭ باسشىلارى قاتىستى. شىڭعىس جۇمابەكۇلى قالامىزدا مادەنيەت سالاسىنا باسا نازار اۋدارىلىپ جاتقانىن ايتتى.

– شىمكەنت قالاسىنىڭ وپەرا جانە بالەت تەاترىندا ۇلكەن وزگەرىستەر ورىن الىپ جاتقانىنا وزدەرىڭىز دە كۋاسىزدەر. الەمگە تانىمال مايرا مۇحامەدقىزى قالامىزعا كەلگەن سوڭ ەكى ايدىڭ ىشىندە «دومالاق انا» وپەراسىن ساحنالاپ شىقتى. ەندى سول قويىلىممەن ەلورداعا اتتانعالى وتىرسىزدار. جولدارىڭىز بولسىن! بۇل ساپار ەلىمىزدىڭ كونستيتۋتسياسى كۇنى مەرەكەسىمەن قاتار كەلىپ وتىر. الداعى ون جىلدىڭ ىشىندە شىمكەنتتىڭ مادەنيەت سالاسىنىڭ شوقتىعى بۇدان دا بيىككە كوتەرىلەدى دەپ سەنەمىز. سەبەبى، قالا اكىمى مۇرات ايتەنوۆتىڭ باستاماسىمەن شىمكەنتتە ارنايى وپەرا زالى سالىنادى دەپ جوسپارلانىپ وتىر، – دەدى شىڭعىس جۇمابەكۇلى.
وپەرا جانە بالەت تەاترىنىڭ ديرەكتورى مايرا مۇحامەدقىزىنىڭ ايتۋىنشا، پاندەمياعا بايلانىستى ەكى جىلدان بەرگى العاشقى ساپارعا ۇجىم تىڭعىلىقتى دايىندالعان. نۇر-سۇلتان قالاسىنا تەاتردىڭ 170-كە جۋىق قىزمەتكەرى اتتانسا، ەلوردادان 50-گە جۋىق مامان مەن ارنايى اسپاپتارمەن قوسىلىپ، «دومالاق انا» وپەراسى ناقىشىنا كەلتىرىپ ورىندالماق.
«دومالاق انا» وپەراسىن ساحنالاۋ ەگەمەن ەلىمىز ءۇشىن تاريحي وقيعا، جاڭا بەلەس بولىپ وتىر. قازاق تاريحىنداعى اتى اڭىزعا اينالعان ابىز انالارىمىزدىڭ ىشىندە قاسيەتتى «دومالاق انا» تۋرالى وقيعا تاريحي شىندىعىنىڭ مولدىعىمەن دارالانىپ تۇراتىن شىعارمالاردىڭ ءبىرى ەكەندىگى ءسوزسىز. قازاق حالقىننىڭ وزىنە ءتان قاسيەتتى انا بەينەسى «دومالاق انا» وپەراسىندا تەرەڭدىكپەن جەتكىزىلگەن. جاس قىز نۋريلانىڭ انا اتانىپ، وسيەت پەن رۋحاني قۇندىلىقتارعا جانە انالىق مەيىرگە تولى عۇمىرى ارقىلى انا ماحابباتىنىڭ قۋاتى وتە كەڭ ءارى شىنايى كورسەتىلىپ، سۋرەتتەلەدى.
«دومالاق انا» وپەراسى تەك انالىق قايسار جۇرەك پەن قالىڭ ەلگە تاراعان كەڭ پەيىلدىلىكتى ايشىقتاپ قانا قويماي، قازاق حالقىنىڭ تاريحىندا ماڭىزدى وقيعالاردىڭ قوزعاۋشىسى بولعان بايدىبەك باتىردىڭ ءوز حالقىنا دەگەن سۇيىسپەنشىلىگىمەن ءبىر ارناعا توعىسىپ، قازاق ەلىنىڭ تاريحي تەرەڭدىگىن، مادەني كوركەمدىگىن كەڭىنەن قامتيدى.
يدەيا اۆتورى - قر ەڭبەك سىڭىرگەن ءارتىسى، مەملەكەتتىك سىيلىقتىڭ لاۋرەاتى مايرا مۇحامەدقىزى، قويىلىمنىڭ كومپوزيتورى قر مادەنيەت سالاسىنىڭ ۇزدىگى، حالىقارالىق بايقاۋلادىڭ لاۋرەاتى تاسقىن جارمۇقامەت. ليبرەتتوسىن جازعان قر ەڭبەك سىڭىرگەن قايراتكەرى اسحات ماەميروۆ، قويۋشى-رەجيسسەر – ميحايل پاندجاۆيدزە; قويۋشى-ديريجەر – ءمادي ومىرزاقوۆ; قويۋشى-سۋرەتشى – باقىت كۇزەمباەۆ.

پىكىرلەر