فرانتسيادا ءدىني قىزمەتكەرلەردىڭ جانتۇرشىگەرلىك قىلمىستارىن اشكەرە قىلعان بايانداما جاريالاندى. وعان سايكەس جۇزدەگەن زورلاۋشى انىقتالىپ، ونداعان مىڭ قۇربان تۋرالى اقپارات شىقتى، دەپ حابارلايدى "ادىرنا" ۇلتتىق پورتالى.
ريا نوۆوستي حابارلاۋىنشا، جاقىندا فرانتسيادا ارنايى ءباسپاسوز ءماسليحاتى وتكەن. وندا 1950 جىلدان بەرى 216 مىڭ بالانىڭ زورلىق-زومبىلىق قۇربانى بولعانى ايتىلدى.
سونداي قورلىقتى كورگەندەردىڭ ءبىرى ليون قالاسىنىڭ تۋماسى كريستيان ديۋبراي جۋرناليستەرگە ولگىسى كەلگەنىن ايتقان. ونىڭ ايتۋىنشا، ول 11 جاستا بولعاندا ونىڭ وتباسىمەن ءدىني قىزمەتكەر دوس بولعان. قىزمەتكەر ءار بەيسەنبى سايىن بالاعا ساباق بەرۋگە ۇيىنە كەلىپ وتىرعان. الايدا سەرۋەن كەزىندە كريستيانعا ءتيىسىپ، اتا-اناسى ەكىنشى قاباتتا بولعاندا ۇيدە زورلاۋعا تىرىسقان.
كريستيان ءوزىنىڭ بۇل وقيعاسىن 2020 جىلى عانا ايتقان. ال وعان تيىسكەن ادام ەلدەگى شىركەۋ قىزمەتىندە جۇرگەن 3 مىڭ پەدوفيلدىڭ ءبىرى بولىپ شىقتى.
ارنايى كوميسسيا سوڭعى 70 جىل ىشىندە شىركەۋدە جۇمىس ىستەگەن 115 مىڭ ءدىني قىزمەتكەردىڭ ءۇش پايىزدان استامى پەدوفيلياعا قاتىسى بار ەكەنىن انىقتاعان. تەرگەۋشىلەردىڭ پىكىرىنشە، بۇل ساندار ادەيى تومەندەتىلىپ كورسەتىلگەن.
فرانتسيا زاڭدارى بويىنشا مەرزىمى وتكەن بۇل ىستەرمەن ەندى ۆاتيكان اينالىسادى. ەگەر پەدوفيلياعا جانە ولاردىڭ قىلمىسىن جاسىرىنۋعا قاتىسى بار ادامداردىڭ كىناسى دالەلدەنسە، وندا جۇزدەگەن ءدىني قىزمەتكەرلەر ءوز اتاق-دارەجەسىنەن ايىرىلادى. جابىرلەنۋشىلەرگە بىرنەشە ميلليون اقش دوللارى كولەمىندە وتەماقى تولەنەدى.
"ادىرنا" ۇلتتىق پورتالى
