13 قازاندا فرانتسيادا جوعارى سىنىپ وقۋشىلارىنىڭ نارازىلىق اكتسيالارىنا شامامەن 480 مىڭ ادام قاتىستى. بۇل تۋرالى RTL راديوستانتسياسى ايتتى، دەپ حابارلايدى «ادىرنا» ءتىلشىسى.
«سەيسەنبى كۇنى فرانتسيانىڭ تۇكپىر-تۇكپىرىندە مەكتەپ وقۋشىلارىنىڭ كەزەكتى جاپپاي نارازىلىق شاراسى ءوتىپ، وعان شامامەن 480 مىڭ ادام قاتىستى»، – دەلىنگەن حابارلامادا.
الايدا فرانتسيا ىشكى ىستەر مينيسترلىگى بۇل اقپاراتتى راستامادى. ءىىم مالىمەتىنشە، نارازىلىق اكتسيالارىنا 61,5 مىڭ ادام قاتىسقان. ونىڭ ىشىندە 41,5 مىڭى پاريج قالاسىندا بولعان.
ەل استاناسىندا ءبىر مەزگىلدە ەكى بولەك نارازىلىق اكتسياسى ۇيىمداستىرىلعان. الايدا ولاردىڭ ءبىرى جاپپاي تارتىپسىزدىككە ۇلاسقان. AFP اگەنتتىگىنىڭ حابارلاۋىنشا، بەتپەردە كيگەن نارازىلار كولىكتەردى ورتەپ، جولدارعا توسقاۋىل قويۋعا ارەكەتتەنگەن جانە پوليتسيا قىزمەتكەرلەرىنە ءتۇرلى زاتتار لاقتىرعان.
پاريج بەن ليون قالالارىندا جاعداي اكتسيا ۇيىمداستىرۋشىلارىنىڭ باقىلاۋىنان شىعىپ كەتكەندىكتەن، پوليتسيا سۋ اتقىش ماشينالار مەن كوزدەن جاس اعىزاتىن گاز قولدانۋعا ءماجبۇر بولدى.
پاريج ماڭىنداعى سەن-دەني قالاسىندا وتكەن شەرۋگە قاتىسۋشىلاردىڭ اراسىنان جۋرناليستەر شۆەتسيالىق بەلسەندى گرەتا تۋنبەرگتى بايقاعان. ونىڭ ايتۋىنشا، ول نارازىلىق اكتسياسىنا ء«بىزدىڭ بولاشاعىمىزدى ۇرلاپ جاتىر» دەگەن سەبەپپەن شىققان.
نارازىلىق بىلدىرۋشىلەردى وپپوزيتسيالىق «باعىنبايتىن فرانتسيا» اتتى سولشىل راديكالدى پارتيا دا قولداعان. پارتيا جەتەكشىسى ءارى پرەزيدەنتتىككە ۇمىتكەر جان-ليۋك مەلانشون پاريجدەگى دەمونسترانتتاردىڭ اراسىنان كورىنگەن.
فرانتسيا پوليتسياسىنىڭ مالىمەتىنشە، نانت، ليون، لانس، ستراسبۋرگ، تۋلۋزا، بوردو جانە مارسەل قالالارىندا دا مىڭداعان ادام قاتىسقان شەرۋلەر ءوتتى.
جوعارى سىنىپ وقۋشىلارىنىڭ نارازىلىق اكتسيالارى قىركۇيەك ايىنىڭ سوڭىندا پاريجدە باستالىپ، كەيىن فرانتسيانىڭ بارلىق وڭىرىنە تارالعان ەدى. قاتىسۋشىلار ساباق كەستەسىنىڭ شامادان تىس تىعىزدىعىنا، مۇعالىمدەردىڭ جەتىسپەۋشىلىگىنە جانە ءبىلىم بەرۋ سالاسىنداعى وزگە دە ماسەلەلەرگە بايلانىستى جاپپاي نارازىلىق ءبىلدىرىپ كەلەدى.
وسى ۋاقىت ارالىعىندا ونداعان مەكتەپ ورتەنىپ، جۇزدەگەن وقۋ ورنى جابىلعان. عيماراتتارعا ايتارلىقتاي زيان كەلگەندىكتەن، ولاردىڭ كەيبىرى بەلگىسىز مەرزىمگە دەيىن جۇمىسىن توقتاتقان. جۇزدەگەن مۇعالىم، پوليتسيا قىزمەتكەرى جانە نارازىلىق اكتسياسىنا قاتىسۋشى زارداپ شەككەن.
