بالانىڭ ميى شايقالعان. رۋدنىيدا ماس ەر ادام جاسوسپىرىمدەرگە تيىسكەن

1538
Adyrna.kz Telegram
فوتو: ۆيدەودان الىندى
فوتو: ۆيدەودان الىندى

قوستاناي وبلىسى رۋدنىي قالاسىندا ماس ەر ادام سپورت الاڭىندا جاسوسپىرىمدەرگە شابۋىل جاسادى. بۇل تۋرالى قوستاناي وبلىسىنىڭ پوليتسيا دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.

مالىمەت بويىنشا، 10 قىركۇيەك كۇنى 13 جاستاعى جاسوسپىرىمدەر فۋتبول ويناپ جۇرگەندە، ويىن الاڭىنا ماس ەر ادام كىرىپ كەتكەن. شىعىپ كەتپەك بولعان بالالاردى ماس قالا تۇرعىنى قۋىپ جەتىپ، تىزەسى مەن جاق تۇسىنان سوققى بەرگەن. بالانىڭ ميى شايقالىپ، اۋرۋحاناعا جەتكىزىلدى. قازىر بالا دارىگەر باقىلاۋىندا.

رۋدنىي قالاسىنىڭ پوليتسياسىندا قر قك 293-بابى "بۇزاقىلىق" بويىنشا سوتقا دەيىنگى تەرگەۋ باستالدى. باپتىڭ ماكسيمالدى سانكتسياسى ەكى جىلعا باس بوستاندىعىنان ايىرۋدى كوزدەيدى. كامەلەتكە تولماعان بالانى ۇرعان ەر ادام مەديتسينالىق ايىقتىرعىشقا ورناتىلىپ، قاماۋعا الىندى. ءجاسوسپىرىم اۋرۋحاناعا جاتقىزىلدى. تەرگەۋ شەڭبەرىندە ساراپتامالار تاعايىندالدى جانە قاجەتتى تەرگەۋ ارەكەتتەرى جۇرگىزىلۋدە. قازىرگى ۋاقىتتا بالانىڭ دەنساۋلىعىنا قاۋىپ ءتونىپ تۇرعان جوق، دەلىنگەن حابارلامادا.

پىكىرلەر