18–21 ناۋرىز ارالىعىندا تۇركىستان وبلىسى اكىمدىگىنىڭ قولداۋىمەن ۇلتتىق باھادۇرلىك مۇرانى جاڭعىرتۋعا باعىتتالعان ءىرى مادەني-تانىمدىق جوبا – «قازاق كۇشىنىڭ كارتاسى» اياسىندا «تۇركىستان وبلىسىنا بالۋان تاس ساپارى» ەكسپەديتسياسى وتەدى.
جوبا اۆتورى – كۇش مادەنيەتىن زەرتتەۋشى، ابىلايحان قالنازاروۆ. ەكسپەديتسيانى «Baluan tas» ۇلتتىق سپورت تۇرلەرى جانە مادەنيەتى اكادەمياسى ۇيىمداستىرىپ وتىر.
ەكسپەديتسيا مارشرۋتى: ساپار باعىتى قازاق وركەنيەتىنىڭ تاريحي جانە ساكرالدى كەڭىستىگىن قامتيدى: شىمكەنت قالاسى – سايرام اۋدانى – ورداباسى اۋدانى – وتىرار اۋدانى – بايدىبەك اۋدانى – سوزاق اۋدانى – ساۋران اۋدانى – تۇركىستان قالاسى.
ەكسپەديتسيا باعدارلاماسى:
13 تاريحي بالۋان تاس نىسانىن زەرتتەۋ. قاتىسۋشىلار قازاقتىڭ ءداستۇرلى كۇش مادەنيەتىنىڭ ايرىقشا مۇراسى – اتاقتى باتىر-پالۋاندار كوتەرگەن بالۋان تاستاردى كوزبەن كورىپ، ولاردىڭ تاريحي-اڭىزدىق، مادەني ءمانىن زەردەلەيدى.
تۇركىستان قالاسىندا وتەتىن كوكپاردان الەمدىك چەمپيوناتتى تاماشالاۋ. باعدارلامادا ۇلتتىق ات سپورتى ارقىلى كۇش مادەنيەتىنىڭ ديناميكالىق فورماسىن تانىتۋ كوزدەلگەن.
وبلىستىڭ وندىرىستىك جانە ەكونوميكالىق ورتالىقتارىن ارالاۋ.
كيەلى ورىندارعا زيارات: ەكسپەديتسيا اياسىندا وڭىردەگى ماڭىزدى ساكرالدى نىساندار قامتىلادى:
- يبراگيم اتا كەسەنەسى
- قاراشاش انا كەسەنەسى
- بيبىعياس انا كەسەنەسى
- سالىق قوجا كەسەنەسى
- بايدىبەك اتا كەسەنەسى
- دومالاق انا كەسەنەسى
- ىسقاق باب كەسەنەسى
- بابا تۇكتى شاشتى ءازيز كەسەنەسى
- جىلاعان اتا
- اقمەشىت اۋليە ۇڭگىرى
- ارىستانباب كەسەنەسى
- قوجا احمەتياساۋي كەسەنەسى
تاريحي نىسانداردى ارالاۋ: وتىرار قالاشىعىنىڭ كونە ورنى جانە باسقا دا ءوڭىر مۋزەيلەرى
كونە كۇشتىك ءراسىمدى جاڭعىرتۋ: ەكسپەديتسيا بارىسىندا وتىرار اۋدانى، ءشاۋىلدىر اۋىلىندا كونە كۇش راسىمدەرىنىڭ ءبىرى قايتا جاڭعىرتىلىپ، مادەني رەكونسترۋكتسيا جاسالادى.
قاتىسۋشىلار قۇرامى: ساپارعا ارنايى جاساقتالعان «بالۋان تاس» جۋرناليستەر مەن بلوگەرلەر پۋلىنىڭ تۇراقتى وكىلدەرى قاتىسادى. ونىڭ قۇرامىندا بەلگىلى جۋرناليستەر مەن بلوگەرلەر، عالىمدار، سپورتشىلار بار. بۇل – جوبانىڭ عىلىمي ناتيجەلەرىن قوعامعا كەڭىنەن جەتكىزۋگە باعىتتالعان ماڭىزدى مەديالىق قادام.
ايتا كەتەيىك، «قازاق كۇشىنىڭ كارتاسى» جوباسىنىڭ تۇساۋى بىلتىر ناۋرىز مەيرامىندا ەلوردادا كەسىلگەن بولاتىن. بۇعان دەيىن جوبا اياسىندا اقتوبە جانە پاۆلودار وبلىستارىنا ەكسپەديتسيالار ۇيىمداستىرىلىپ، العاشقى عىلىمي-مادەني دەرەكتەر جيناقتالدى. رەتتىك جاعىنان ءۇشىنشى تۇركىستان باعىتى – جوبانىڭ رۋحاني-تاريحي تۇرعىدان ەڭ ماڭىزدى كەزەڭدەرىنىڭ ءبىرى. سونىمەن قاتار بۇل جولعى ساپار ناۋرىز مەيرامى مەن تۇركىستاندا وتەتىن كوكپاردان الەمدىك چەمپيوناتى ءىس-شاراسىنا ورايلاستىرىلىپ وتىر.
جوبانىڭ باستى ماقساتى – قازاقتىڭ ءداستۇرلى كۇش مادەنيەتىن زەرتتەۋ، بالۋان تاستاردى ۇلتتىق مۇرا رەتىندە جۇيەلەۋ، ولاردى زاماناۋي مادەني اينالىمعا ەنگىزۋ، سونداي-اق ۇلتتىق بىرەگەيلىكتى نىعايتۋ.
ۇيىمداستىرۋشى: «Baluan tas» ۇلتتىق سپورت تۇرلەرى جانە مادەنيەتى اكادەمياسى. توپ جەتەكشىسى «Baluan tas» اكادەمياسىنىڭ پرەزيدەنتى ابىلايحان قالنازاروۆ.
