تۇركىستان وبلىسىندا 15 جاستاعى وقۋشى قىز مەكتەپتەگى ەمتيحاننان كەيىن وزىنە قول سالدى. قايعىلى جاعداي 2 ماۋسىمدا ورداباسى اۋدانىنداعى كوكارال ەلدى-مەكەنىندە بولعان. قارا جامىلعان وتباسى بۇعان مەكتەپ ديرەكتورىن كىنالايدى. بۇل تۋرالى “ادىرنا” ۇلتتىق پورتالى استانا تەلەارناسىنا سىلتەمە جاساپ حابارلايدى.
م.جۇماباەۆ اتىنداعى جالپى ورتا مەكتەپتىڭ ديرەكتورى ايسارا ستاەۆا AstanaTV تىلشىلەرىنە بەرگەن سۇحباتىندا ەشكىمگە قىسىم جاساماعانىن ايتقان، دەپ جازادى اzattyq-ruhy.kz پورتالى.
«توراعا رەتىندە ماعان ورىن بەردى، مەن سول ورىندا وتىردىم. بالانىڭ توبەسىنەن قاراپ، قاسىنا بارىپ ەشتەڭە ىستەگەن جوقپىن. قىسىم؟ قىسىم جاساعان جوقپىن»، - دەيدى م.جۇماباەۆ اتىنداعى جالپى ورتا مەكتەپتىڭ ديرەكتورى ايسارا ستاەۆا.
قازىر مەكتەپتە تەرگەۋشىلەردەن بولەك ارنايى كوميسسيا جۇمىس ىستەپ جاتىر. ءمان-جايدى سولار انىقتاماق.
«شىعارعان ەسەپتەرىنىڭ ءبارىن ءبىز قاراپ جاتىرمىز. زەردەلەۋ ءجۇرىپ جاتىر. قورتىندىسىن، ناتيجەسىن بىتكەننەن كەيىن ايتامىز ارينە. بىزبەن بىرگە قازىر تەرگەۋ ورىندارى دا قازىر جۇمىس جۇرگىزىپ جاتىر»، - دەيدى تۇركىستان وبلىستىق ادامي الەۋەتتى دامىتۋ باسقارماسىنىڭ ءبولىم باسشىسى، كوميسسيا وكىلى الىبەك كەنجەباەۆ.
پوليتسيا بۇل جاعدايعا قاتىستى «ءوزىن-ءوزى ولتىرۋگە دەيىن جەتكىزۋ» بابى بويىنشا قىلمىستىق ءىس قوزعادى. ال، مارقۇمنىڭ اناسى ايمان قانايقىزى قىزى تەلەفونىنا حات جازىپ قالدىرعانىن ايتتى.
«تەلەفونىندا «ماما! كەشىرىڭىزشى! ءسىزدىڭ ءۇمىتىڭىزدى اقتاي المادىم. ءسىزدىڭ اتىڭىزعا جاقسى ات كەلتىرە المادىم» دەگەن سووبششەنيەسى تۇر ەكەن. ونى جىبەرمەگەن»، - دەيدى مارقۇمنىڭ اناسى.
