شىمكەنتتە بىرنەشە ادامدى ءولتىردى دەگەن كۇدىكپەن 28 جاستاعى ەر ادام ۇستالدى. اتالعان وقيعا بويىنشا، ەكى ادام قازا تاۋىپ، بىرەۋى اۋىر جاراقاتپەن اۋرۋحاناعا جەتكىزىلدى، دەپ حابارلايدى "ادىرنا" ۇلتتىق پورتالى «وتىرار» تەلەارناسىنا سىلتەمە جاساپ.
پوليتسيانىڭ حابارلاۋىنشا، 4 قاڭتار، ساعات 18:00 شاماسىندا اباي داڭعىلىنىڭ بويىنان دەنەسىندە بىرنەشە پىشاق جاراقاتى بار 48 جاستاعى ەر ادام تابىلىپ، ول N1 قالالىق اۋرۋحاناسىنا جەتكىزىلگەن.
اراعا ۋاقىت سالىپ 1 مامىر كوشەسىندە 1984 جىلى تۋعان ەر ادامنىڭ ءمايىتى تابىلدى. الايدا جاعا ۇستاتارلىق وقيعا مۇنىمەن اياقتالعان جوق.
5 قاڭتار كۇنى ساعات 12:00 شاماسىندا شىمكەنت قالاسىنىڭ ەڭبەكشى اۋدانىندا تاعى ءبىر ەر ادامنىڭ ءمايىتى تابىلدى.
سول كۇنى تاۋكە حان داڭعىلىنىڭ بويىندا قىلمىسقا قاتىسى بار دەگەن كۇدىكپەن 28 جاستاعى ازامات ۇستالدى.
"كۇدىكتى ۇستالدى. اسا اۋىر قىلمىس جاساۋ فاكتىسى بويىنشا قىلمىستىق ءىس قوزعالدى. تەرگەۋ شارالارى جۇرگىزىلۋدە. قاجەتتى ساراپتامالار تاعايىندالدى. تەرگەۋ مۇددەسى ءۇشىن وزگە اقپارات جاريا ەتىلمەيدى", - دەلىنگەن شىمكەنت قالالىق پد رەسمي حابارلاماسىندا.
"ادىرنا" ۇلتتىق پورتالى
