مەملەكەت باسشىسىنىڭ تاپسىرماسىنا وراي جەرگىلىكتى اتقارۋشى ورگاندار ءوڭىردى اۋىز سۋمەن قامتاماسىز ەتۋ ماسەلەسىمەن اينالىسۋدا. جاقىندا وبلىس اكىمدىگىنە بىرقاتار كاسىپكەر حابارلاسىپ، جەكە ينۆەستيتسيا ەسەبىنەن سۋ تۇشىتۋ زاۋىتىن سالۋعا ۇسىنىس جاسادى، دەپ حابارلايدى ماڭعىستاۋ وبلىسى اكىمىنىڭ ءباسپاسوز قىزمەتى.
ەستەرىڭىزگە سالا كەتسەك، وبلىس اكىمى نۇرلان نوعاەۆ 13 قىركۇيەكتە وتكەن اپپاراتتىق جيىندا سۋ تۇشىتاتىن زاۋىت قۇرىلىسىنا قارجى سالۋعا دايىن ينۆەستوردىڭ تابىلعانىن ايتىپ، اقتاۋ قالاسىنىڭ اكىمىنە جوبانى جەدەلدەتۋدى تاپسىرعان بولاتىن.
50 گا جەردە سىيىمدىلىعى 40 مىڭ تەكشە مەتر سۋ باسسەيندەرى مەن سۋدى تۇشىتاتىن قوندىرعىلار بوي كوتەرەدى. ينۆەستيتسيالىق جوبانىڭ قۇنى 4 ملرد تەڭگە.
- جۋىردا پرەزيدەنتتىڭ ماڭعىستاۋ وبلىسىنا كەلگەن ساپارى بارىسىندا سۋ ماسەلەسىن شەشۋ تۋرالى تاپسىرما بەرىلگەن بولاتىن. حالىقتى ۇزدىكسىز اۋىز سۋمەن قامتۋعا باعىتتالعان جوبالاردى جەدەلدەتۋگە كىرىستىك. سۋ تۇشىتاتىن زاۋىت سالۋعا كەلىسكەن ينۆەستورمەن قاجەتتى كەلىسىمدەر جاسالدى،-دەدى اقتاۋ قالاسىنىڭ اكىمى نۇرداۋلەت قيلىباي.
جاڭا زاۋىتتىڭ جوسپارلانعان قۋاتى 20 مىڭ تەكشە مەتردەن استام. 2022 جىلى ىسكە قوسىلاتىن جوبانىڭ العاشقى كەزەڭىندە تاۋلىگىنە 5 مىڭ تەكشە مەتر سۋ وندىرىلمەك.
- تەحنيكالارىمىز جەتكىلىكتى. كانال قازۋ جۇمىستارىن باستاپ كەتتىك. قاجەتتى قۇرىلعىلارعا تاپسىرىس بەرىپ جاتىرمىز. ءبىر بولىگى اقش، ەۆروپا ەلدەرىنەن، ەندى ءبىر بولىگى يراننان جەتكىزىلەدى،-دەدى جوبا قۇرىلتايشىسى ەسمان جۇماباەۆ.
"ادىرنا" ۇلتتىق پورتالى
