قازاقستاندا ەندى ءاربىر ازاماتقا تاۋلىگىنە 140 ليتر اۋىز سۋدان ارتىق قولدانۋعا بولمايدى. جاڭا ءتارتىپتى بۇزعاندار ءۇشىن تاريف 30 پايىزعا قىمباتتايدى، دەپ حابارلايدى "ادىرنا".
مينيسترلىك بەكىتكەن نورماعا سايكەس، ءار ادامعا ءبىر كۇندە 140 ليتر سۋ بەرىلەدى. بۇل شەكتەن اسقاندار قوسىمشا اقى تولەۋگە مىندەتتى بولادى. شەنەۋنىكتەردىڭ ايتۋىنشا، مۇنداي شارا سۋدى ۇنەمدەۋگە باعىتتالعان.
تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى نۇرسۇلتان كەرىمقۇلوۆتىڭ سوزىنشە، بۇعان دەيىن وڭىرلەردە سۋ ءتاريفى ءارتۇرلى ەسەپتەلگەن. مەملەكەت جەرگىلىكتى جۇيەلەردى سۋبسيديالاپ كەلگەندىكتەن، بيۋدجەتكە قوسىمشا اۋىرتپالىق تۇسكەن.
«قازىرگى تاڭدا ءبىر ادامعا تاۋلىگىنە 140 ليتر تولىق جەتكىلىكتى دەپ ەسەپتەيمىز»، — دەدى ول.
جاڭا ەرەجە 13 قىركۇيەكتەن باستاپ قولدانىسقا ەنگىزىلەدى. وسى كۇننەن باستاپ ءار ليتر سۋ ەسەپكە الىنىپ، ارتىق پايدالانعان جاعدايدا ازاماتتار قوسىمشا تولەم جاسايدى. ۇكىمەت حالىقتى ىسىراپشىلدىقتان ارىلىپ، تىرشىلىك ءنارىن ۇنەمدەۋگە شاقىرىپ وتىر.
