15 مامىر كۇنى «اقتاۋ - تۇركى الەمىنىڭ مادەني استاناسى» جىلى اياسىندا قازاقستان حالقى اسسامبلەياسىنىڭ جانىنان قۇرىلعان انالار كەڭەسىنىڭ «انا. قوعام. بولاشاق» تاقىرىبىندا حالىقارالىق فورۋم ءوتتى.
فورۋمعا ماڭعىستاۋ وبلىسى اكىمىنىڭ ورىنباسارى تىلەگەن ابىشەۆ، قر پرەزيدەنتى اكىمشىلىگىنىڭ قازاقستان حالقى اسسامبلەياسى حاتشىلىعى مەڭگەرۋشىسىنىڭ ورىنباسارى اناستاسيا ششەگورتسوۆا، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى، ءازىربايجان، قىرعىزستان، وزبەكستان جانە تۇركيا ەلدەرىنەن دەلەگاتتار جانە رەسپۋبليكانىڭ ءار وڭىرىنەن كەلگەن انالار كەڭەسىنىڭ وكىلدەرى مەن قوعام بەلسەندىلەرى قاتىستى.
جيىندا ءسوز العان تىلەگەن ابىشەۆ انالار كەڭەسىنىڭ وتباسى قۇندىلىقتارىن ساقتاۋدا، ۇرپاق تاربيەسىندەگى ماڭىزدىلىعىنا توقتالدى.
- مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ ءحححىV سەسسياسىندا انالار كەڭەسى وتباسى ينستيتۋتىن نىعايتۋعا، جالپىۇلتتىق قۇندىلىقتاردى ناسيحاتتاۋعا ايرىقشا ۇلەس قوسىپ وتىرعانىن اتاپ ءوتتى. راسىندا دا، وتباسى – مەملەكەتتىڭ ىرگەتاسى دەسەك، سول ىرگەتاستى بەرىك ۇستايتىن دا – انا. قازىرگى تاڭدا انالار كەڭەسى ۇلتتىق قۇندىلىقتاردى ناسيحاتتاۋمەن قاتار، قوعامنىڭ ەڭ وزەكتى ماسەلەلەرىنە ارالاسىپ، ناقتى جوبالاردى جۇزەگە اسىرىپ كەلەدى. «سالاۋاتتى سانا» باستاماسى ارقىلى بەس بىردەي كەسەلگە – ىسىراپشىلدىق، تۇرمىستىق زورلىق-زومبىلىق، لۋدومانيا، ۆانداليزم جانە ناشاقورلىققا قارسى ناقتى ءىس-شارالار جۇرگىزىلۋدە. بۇل – جاي ۇگىت-ناسيحات ەمەس، ءار وتباسىنىڭ تىنىشتىعى مەن بولاشاعىنا باعىتتالعان كەشەندى جۇمىس، - دەدى تىلەگەن ابىشەۆ.
فورۋم اياسىندا قاتىسۋشىلار انا مەن بالا قۇقىعىن قورعاۋ، وتباسىنداعى تاربيەنىڭ ماڭىزى، ايەلدەردىڭ الەۋمەتتىك قولداۋعا مۇقتاج توپتارمەن جۇمىسى جانە جاستاردى رۋحاني-ادامگەرشىلىك قۇندىلىقتار نەگىزىندە تاربيەلەۋ ماسەلەلەرىن كەڭىنەن تالقىلادى. سونداي-اق بۇگىنگى قوعامنىڭ وزەكتى ماسەلەسىنە اينالعان لۋدومانيا تاقىرىبى قوزعالىپ، بۇل دەرتتىڭ الدىن الۋ جانە وعان قارسى كۇرەستىڭ ءتيىمدى جولدارى ۇسىنىلدى.
جيىن سوڭىندا انالار كەڭەسىنىڭ بەلسەندى مۇشەلەرى مەن «مادەنيەتتى انا – مادەنيەتتى ۇلت» جوباسى اياسىنداعى ۇزدىك انالار «التىن شاڭىراق»، «كۇمىس كەرەگە»، «ەلىنە ازامات تاربيەلەگەن وتباسى»، «ايالى الاقان»، «ەل اناسى» سىندى نوميناتسيالارمەن ماراپاتتالدى.
