اقتاۋ قالاسىندا اۆتوگاز قۇيۋ ستانتسيالارىندا (اگزس) كەزەك قايتا ۇزاردى. 11 قازان كۇنى تاڭەرتەڭ كولىك جۇرگىزۋشىلەرى بەكەتتەر الدىندا اشىلماي جاتىپ جينالا باستاعان. بۇل تۋرالى Lada.kz جازدى، دەپ حابارلايدى “ادىرنا”.
كۋاگەرلەردىڭ ايتۋىنشا، كەيبىر جۇرگىزۋشىلەر تاڭعى 07:50-دە كەلگەنىمەن، ولاردىڭ الدىندا بەس كولىك تۇرعان. ءبىر جارىم ساعات ىشىندە كەزەك 30 كولىككە دەيىن سوزىلعان.
جەرگىلىكتى تۇرعىندار جاعدايعا الاڭداۋشىلىق بىلدىرۋدە. "مەزگىلى باياعىدا اياقتالدى، تۋريستەر جوق، بىراق گاز ءالى جەتىسپەيدى. قاشانعى وسىلاي ءومىر سۇرەمىز؟" – دەيدى كۇن سايىن گاز قۇياتىن اقتاۋ تۇرعىنى.
ماڭعىستاۋ وبلىسىنىڭ كاسىپكەرلىك جانە ساۋدا باسقارماسى ءوڭىردىڭ سۇيىتىلعان گازدىڭ ەڭ ءىرى تۇتىنۋشىلارىنىڭ ءبىرى ەكەنىن مالىمدەدى. اي سايىن وبلىس بويىنشا شامامەن 18 مىڭ توننا گاز قولدانىلادى. ونىڭ نەگىزگى بولىگى قازاق گاز وڭدەۋ زاۋىتىنان جەتكىزىلسە، قالعان كولەم اتىراۋدان كەلەدى.
الايدا، قازىرگى تاڭدا اتىراۋداعى زاۋىتتا جوندەۋ جۇمىستارى جۇرگىزىلۋىنە بايلانىستى جاعداي كۇردەلەنگەن. وسىعان وراي، گازدىڭ ءبىر بولىگى اقتوبەدەگى زاۋىتتان جەتكىزىلۋدە. بۇرىن گاز اۆتوكولىكپەن تاسىمالدانسا، قازىر تەمىر جول ارقىلى تاسىمالدانۋدا، بۇل جەتكىزۋ مەرزىمىن ۇزارتىپ وتىر.
باسقارمانىڭ مالىمەتىنشە، 11 ۆاگوننان تۇراتىن العاشقى گاز پارتياسى اقتاۋعا جونەلتىلگەن. تاعى 10 ۆاگون 13 قازاندا جەتەدى دەپ كۇتىلۋدە. ماماندار كەزەكتەردىڭ ۇزارۋىن وسى لوگيستيكالىق وزگەرىستەرمەن بايلانىستىرىپ وتىر. گاز جەتكىزىلىمىن تولىق تۇراقتاندىرۋ قاراشا ايىنىڭ باسىنا دەيىن جوسپارلانۋدا.
