بيىل شىمكەنتتە ۇبت بويىنشا ورتا بالل – 76,5-ءتى قۇراپ وتىر. بۇل تۋرالى بۇگىن باسقارما باسشىسى جانات تاجيەۆانىڭ قالا اكىمىنە بەرگەن 6 ايلىق ەسەبىندە ءمالىم بولدى. ەلدەگى پاندەميا جاعدايىنا قاراماستان بۇل كورسەتكىش بىلتىرعىمەن سالىستىرعان ءبىرشاما جوعارى. وتكەن جىلى وقۋشىلاردىڭ تەستىلەۋدەگى ورتاشا بالى 75-ءتى قۇراعان بولاتىن. ايتا كەتەيىك، بيىل شىمكەنت مەكتەپتەرىنەن 9 342 تۇلەك قانات قاقسا، ونىڭ 500-گە جۋىعى - «التىن بەلگى»، 422-ءسى «ۇزدىك اتتەستات» يەگەرلەرى اتاندى. ال مەملەكەتتىك گرانت ۇتىپ العان شاكىرتتەر تامىز ايىندا انىقتالادى.
قالا باسشىسى ءبىلىم نىساندارىنىڭ جاڭا وقۋ جىلىنا دايىندىعىن پىسىقتادى. بيىل شاھارداعى 175 ءبىلىم مەكەمەسىنىڭ عيماراتىنا اعىمداعى جوندەۋ جۇمىستارىن جۇرگىزۋ ءۇشىن 330 ملن. تەڭگەدەن استام قارجى قارالىپتى. قۇرىلىس نىساندارىنىڭ 85%-دا مەردىگەر انىقتالعان. بۇگىندە جوندەۋ جۇمىستارى جۇرگىزىلىپ جاتىر. باسقارما باسشىسى قۇرىلىس جۇمىستارى تامىز ايىنىڭ 10-نا اياقتالادى دەيدى. ءبىلىم بەرۋ ۇيىمدارىنداعى بالالاردىڭ قاۋىپسىزدىگى دە باستى نازاردا. بيىلعى جىلى مەملەكەتتىك مەكتەپتەرگە تۋرنيكەت ورناتۋ ءۇشىن بيۋدجەتتەن 359,4 ملن. تەڭگە قارجى ءبولىنىپ، كەلىسىم-شارت ءتۇزىلدى. جىل سوڭىنا دەيىن مەكتەپتەر تۇگەدەي ادامنىڭ بەت-الپەتىن تانيتىن تۋرنيكەتپەن قامتىلاتىن بولادى. الايدا، جەرگىلىكتى مەكتەپتەردە ۆەدومستۆالىق كۇزەت قاراستىرىلماعان. سالاعا جاۋاپتىلار بۇل ماسەلەنى ۇنەمدەلگەن قارجىدان شەشەمىز دەپ وتىر.
