Bıyl Shymkentte UBT boıynsha orta ball – 76,5-ti qurap otyr. Bul týraly búgin basqarma basshysy Janat Tájıevanyń qala ákimine bergen 6 aılyq esebinde málim boldy. Eldegi pandemııa jaǵdaıyna qaramastan bul kórsetkish byltyrǵymen salystyrǵan birshama joǵary. Ótken jyly oqýshylardyń testileýdegi ortasha baly 75-ti quraǵan bolatyn. Aıta keteıik, bıyl Shymkent mektepterinen 9 342 túlek qanat qaqsa, onyń 500-ge jýyǵy - «Altyn belgi», 422-si «Úzdik attestat» ıegerleri atandy. Al memlekettik grant utyp alǵan shákirtter tamyz aıynda anyqtalady.
Qala basshysy bilim nysandarynyń jańa oqý jylyna daıyndyǵyn pysyqtady. Bıyl shahardaǵy 175 bilim mekemesiniń ǵımaratyna aǵymdaǵy jóndeý jumystaryn júrgizý úshin 330 mln. teńgeden astam qarjy qaralypty. Qurylys nysandarynyń 85%-da merdiger anyqtalǵan. Búginde jóndeý jumystary júrgizilip jatyr. Basqarma basshysy qurylys jumystary tamyz aıynyń 10-na aıaqtalady deıdi. Bilim berý uıymdaryndaǵy balalardyń qaýipsizdigi de basty nazarda. Bıylǵy jyly memlekettik mektepterge týrnıket ornatý úshin bıýdjetten 359,4 mln. teńge qarjy bólinip, kelisim-shart túzildi. Jyl sońyna deıin mektepter túgedeı adamnyń bet-álpetin tanıtyn týrnıketpen qamtylatyn bolady. Alaıda, jergilikti mektepterde vedomstvalyq kúzet qarastyrylmaǵan. Salaǵa jaýaptylar bul máseleni únemdelgen qarjydan sheshemiz dep otyr.
