اۋىز سۋ نىساندارىنىڭ قۇرىلىسىن جەدەلدەتۋدى تاپسىردى

1038
Adyrna.kz Telegram

شىمكەنت قالاسىنىڭ اكىمى مۇرات ايتەنوۆكە بيىلعى جىلدىڭ التى ايىندا اتقارىلعان جۇمىستار تۋرالى ەسەپتى قالالىق ەنەرگەتيكا جانە ينفراقۇرىلىمدى دامىتۋ باسقارماسىنىڭ باسشىسى ب.بولاتبەكوۆ تاپسىردى. باسقارما باسشىسى بەرگەن اقپاراتقا سايكەس، بيىلعى جىلى باسقارما تاراپىنان 93 جوبا ىسكە اسىرىلۋدا. ونىڭ ىشىندە اۋىز سۋ بويىنشا – 14, كارىز جۇيەسى – 13, ەلەكتر ەنەرگياسى – 20, تابيعي گازبەن قامتۋ – 18, جىلۋ جۇيەلەرى – 3 جانە ينجەنەرلىك ينفراقۇرىلىم بويىنشا – 25 نىساننىڭ قۇرىلىستارى قولعا الىنعان.

بيىلعى جىلى اۋىز سۋدى كەستەمەن تۇتىنۋعا ءماجبۇر 5 تۇرعىن الاپ پەن شاعىن اۋدانداردىڭ ەكەۋىندە اۋىز سۋ جۇيەلەرىنىڭ قۇرىلىسى جۇرگىزىلسە، سۋ تاسىمالداپ ىشەتىن 7 ەلدى مەكەننىڭ تۇرعىندارى ورتالىقتاندىرىلعان سۋ جۇيەلەرىمەن قامتىلماق. ماگيسترالدى جۇيەلەر بويىنشا 3 نىساننىڭ قۇرىلىسى باستالعان. ىشكى ورامدىق سۋ جۇيەلەرىنىڭ قۇرىلىسى 11 شاعىن اۋداندا جۇرگىزىلىپ وتىر. قۇرساي شاعىن اۋدانىن قامتيتىن اۋىز سۋ نىسانىنىڭ قۇرىلىسى 2022 جىلى اياقتالماق. قالا تۇرعىندارىن اۋىز سۋمەن قامتۋ ماسەلەسىن ءجىتى قاراعان قالا اكىمى مۇرات ايتەنوۆ ماگيسترالدى جۇيەلەر ەڭ باستى ارنا ەكەندىگىن ەسكە سالىپ، ونىڭ قۇرىلىستارىن ىشكى ورامدىق جۇيەلەردەن بۇرىن اياقتاۋ كەرەكتىگىن مىندەتتەدى.

ينفراقۇرىلىمدىق جۇيەلەردى جاڭارتۋ كەزەك كۇتتەرمەيتىن ماسەلە

باسقارما باسشىسى بەرگەن مالىمەتكە سايكەس، تۇرعىنداردى ەلەكتر قۋاتىمەن قامتاماسىز ەتۋ بويىنشا بيىل 18 جوبا قولعا الىنىپ، ىسكە اسىرىلۋدا. ونىڭ ىشىندە 15 تۇرعىن الاپ پەن شاعىن اۋداندا  ەلەكتر جۇيەلەرىن جاڭارتۋ جۇمىستارى كوزدەلىپ، 3 قوسالقى ستانتسيانىڭ قۇرىلىستارىن جۇرگىزۋ جوسپارلانعان. ناتيجەسىندە بيىل 21 مىڭنان استام ادام تۇتىناتىن ەلەكتر قۋاتىنىڭ ساپاسى ارتادى. تابيعي گازبەن قامتۋ بويىنشا 7 جوبانىڭ قۇرىلىسى قارقىندى تۇردە اتقارىلۋدا. ونىڭ ىشىندە 2 ماگيسترالدى جۇيەلەر مەن بەس شاعىن اۋداندى گازبەن قامتۋ جۇمىستارى اتقارىلىپ وتىر. وعان قوسىمشا 12 جوبانىڭ قۇرىلىسى 2022 جىلعا وتپەلى.

الەۋمەتتىك ماڭىزى بار 700-دەن استام كوشەگە جارىقشامدار ورناتىلادى

قالا كوشەلەرىن اباتتاندىرۋ ماسەلەسىندە كوشەلەرگە ەلەكتر جارىعىن ورناتۋ جوسپارلانعان. قازىرگى تاڭدا قالاداعى الەۋمەتتىك ماڭىزى بار 747 كوشەنىڭ 220 كوشەسىنە عانا جارىقشامدار ورناتىلعان. بيىل 324 كوشەگە جارىقشامدار ورناتۋ، ەسكى جارىقشامداردى اۋىستىرۋ جۇمىستارىن اتقارۋ كوزدەلگەن. مەملەكەتتىك-جەكەمەنشىك ارىپتەستىك شەڭبەرىندە 104 كوشە بويىنشا ىسكەرلىك ورتا وكىلدەرىمەن كەلىسىمشارتتار تۇزىلگەن. قازىرگى تاڭدا بۇل جۇمىستار 31 كوشەدە اتقارىلعان.

 

اۆت. ايگەرىم

 

پىكىرلەر