Shymkent qalasynyń ákimi Murat Áıtenovke bıylǵy jyldyń alty aıynda atqarylǵan jumystar týraly esepti qalalyq energetıka jáne ınfraqurylymdy damytý basqarmasynyń basshysy B.Bolatbekov tapsyrdy. Basqarma basshysy bergen aqparatqa sáıkes, bıylǵy jyly basqarma tarapynan 93 joba iske asyrylýda. Onyń ishinde aýyz sý boıynsha – 14, káriz júıesi – 13, elektr energııasy – 20, tabıǵı gazben qamtý – 18, jylý júıeleri – 3 jáne ınjenerlik ınfraqurylym boıynsha – 25 nysannyń qurylystary qolǵa alynǵan.
Bıylǵy jyly aýyz sýdy kestemen tutynýǵa májbúr 5 turǵyn alap pen shaǵyn aýdandardyń ekeýinde aýyz sý júıeleriniń qurylysy júrgizilse, sý tasymaldap ishetin 7 eldi mekenniń turǵyndary ortalyqtandyrylǵan sý júıelerimen qamtylmaq. Magıstraldy júıeler boıynsha 3 nysannyń qurylysy bastalǵan. Ishki oramdyq sý júıeleriniń qurylysy 11 shaǵyn aýdanda júrgizilip otyr. Qursaı shaǵyn aýdanyn qamtıtyn aýyz sý nysanynyń qurylysy 2022 jyly aıaqtalmaq. Qala turǵyndaryn aýyz sýmen qamtý máselesin jiti qaraǵan qala ákimi Murat Áıtenov magıstraldy júıeler eń basty arna ekendigin eske salyp, onyń qurylystaryn ishki oramdyq júıelerden buryn aıaqtaý kerektigin mindettedi.
INFRAQURYLYMDYQ JÚIELERDI JAŃARTÝ KEZEK KÚTTERMEITIN MÁSELE
Basqarma basshysy bergen málimetke sáıkes, turǵyndardy elektr qýatymen qamtamasyz etý boıynsha bıyl 18 joba qolǵa alynyp, iske asyrylýda. Onyń ishinde 15 turǵyn alap pen shaǵyn aýdanda elektr júıelerin jańartý jumystary kózdelip, 3 qosalqy stanııanyń qurylystaryn júrgizý josparlanǵan. Nátıjesinde bıyl 21 myńnan astam adam tutynatyn elektr qýatynyń sapasy artady. Tabıǵı gazben qamtý boıynsha 7 jobanyń qurylysy qarqyndy túrde atqarylýda. Onyń ishinde 2 magıstraldy júıeler men bes shaǵyn aýdandy gazben qamtý jumystary atqarylyp otyr. Oǵan qosymsha 12 jobanyń qurylysy 2022 jylǵa ótpeli.
ÁLEÝMETTIK MAŃYZY BAR 700-DEN ASTAM KÓShEGE JARYQShAMDAR ORNATYLADY
Qala kóshelerin abattandyrý máselesinde kóshelerge elektr jaryǵyn ornatý josparlanǵan. Qazirgi tańda qaladaǵy áleýmettik mańyzy bar 747 kósheniń 220 kóshesine ǵana jaryqshamdar ornatylǵan. Bıyl 324 kóshege jaryqshamdar ornatý, eski jaryqshamdardy aýystyrý jumystaryn atqarý kózdelgen. Memlekettik-jekemenshik áriptestik sheńberinde 104 kóshe boıynsha iskerlik orta ókilderimen kelisimsharttar túzilgen. Qazirgi tańda bul jumystar 31 kóshede atqarylǵan.
AVT. ÁIGERIM
