شىمكەنتتىڭ بەس جىلدىق دامۋ جوسپارىندا قولايلى قالا قالىپتاستىرۋ مىندەتى بەلگىلەنىپ، ونىڭ اياسىندا اتقارىلاتىن جۇمىستار ايقىندالعان. ازاماتتارعا قولايلى ورتا قۇرۋ شەڭبەرىندە تۇرعىنداردىڭ تالاپ-تىلەگى مىندەتتى تۇردە ەسكەرىلەدى. بۇل باعىتتا مەملەكەت باسشىسى قاسىم-جومارت توقاەۆتىڭ قوعامداعى اشىقتىق پەن جاريالىلىقتى جەتىلدىرە تۇسەتىن تاعى ءبىر رەفورماسى – «حالىق قاتىساتىن بيۋدجەت» جوباسىنىڭ ماڭىزى وراسان.
بيىلعى العاشقى جارتىجىلدىقتا حالىق قاتىساتىن اشىق بيۋدجەت جوباسى اياسىندا شاعىن اۋداندار مەن تۇرعىن الاپتاردا 66 كوپقاباتتى تۇرعىن ۇيلەردىڭ اۋلالارى اباتتاندىرىلدى. بەلگىلەنگەن جۇمىستاردى ىسكە اسىرۋ بارىسىندا تۇرعىنداردىڭ تالاپ-تىلەگى ەسكەرىلىپ، بالالار ويىن الاڭشالارى مەن سپورت الاڭشالارىنىڭ جوبالارى، جاسىل جەلەكتى كۇتىپ-ۇستاۋ ماسەلەلەرى كەلىسىلدى. تۇرعىنداردىڭ تالاپ-تىلەگى كوشەلەرگە بەينەباقىلاۋ كامەرالارىن ورناتۋ ىسىندە دە ەسكەرىلەدى. قازىرگى كەزدە قالا كوشەلەرىنە 2479 كامەرا ورناتىلعان بولسا، بيىل ولاردىڭ سانىن قوسىمشا 3740 بىرلىككە ۇلعايتۋ جوسپارلانعان. تۇرعىنداردىڭ وتىنىشتەرى بويىنشا 1500 بەيناباقىلاۋ كامەرالارى كوپقاباتتى تۇرعىن ءۇي اۋلالارى مەن قوعامدىق ورىندارعا قويىلاتىن بولادى. كولىك قوزعالىسى اسا باقىلاۋدى قاجەت ەتەتىن جول ۋچاسكەلەرىنە 2240 دانا بەينەباقىلاۋ قۇرىلعىلارى ورناتىلادى. ايتا كەتەيىك، حالىق قاتىساتىن بيۋدجەت ازاماتتاردىڭ جەرگىلىكتى بيۋدجەت قاراجاتىنىڭ ءبىر بولىگىن ءبولۋ مەن جۇمساۋعا قاتىسۋىنا مۇمكىندىك بەرەتىن جوبا. ياعني، ءبىر ازامات ۇسىنىپ، تۇرعىنداردىڭ كوپشىلىگى قولداۋ بىلدىرگەن جوبالار جەرگىلىكتى بيۋدجەتتەن قارجىلاندىرىلادى. وسىلايشا ازاماتتار وزدەرى تۇراتىن اۋماقتاردى دامىتۋ مەن اباتتاندىرۋعا قاتىسادى. جوبانى جۇزەگە اسىرۋ ءۇشىن شىمكەنت قالاسىندا ارنايى ءىس-شارا جوسپارى بەكىتىلىپ، ول ءتورت اۋداننىڭ اكىمدىكتەرى ارقىلى ورىندالۋدا. وسى ماقساتتا ارنايى www.open-shymkent.kz ينتەرنەت رەسۋرسى ازىرلەندى.
