Shymkenttiń bes jyldyq damý josparynda qolaıly qala qalyptastyrý mindeti belgilenip, onyń aıasynda atqarylatyn jumystar aıqyndalǵan. Azamattarǵa qolaıly orta qurý sheńberinde turǵyndardyń talap-tilegi mindetti túrde eskeriledi. Bul baǵytta Memleket basshysy Qasym-Jomart Toqaevtyń qoǵamdaǵy ashyqtyq pen jarııalylyqty jetildire túsetin taǵy bir reformasy – «Halyq qatysatyn bıýdjet» jobasynyń mańyzy orasan.
Bıylǵy alǵashqy jartyjyldyqta halyq qatysatyn ashyq bıýdjet jobasy aıasynda shaǵyn aýdandar men turǵyn alaptarda 66 kópqabatty turǵyn úılerdiń aýlalary abattandyryldy. Belgilengen jumystardy iske asyrý barysynda turǵyndardyń talap-tilegi eskerilip, balalar oıyn alańshalary men sport alańshalarynyń jobalary, jasyl jelekti kútip-ustaý máseleleri kelisildi. Turǵyndardyń talap-tilegi kóshelerge beınebaqylaý kameralaryn ornatý isinde de eskeriledi. Qazirgi kezde qala kóshelerine 2479 kamera ornatylǵan bolsa, bıyl olardyń sanyn qosymsha 3740 birlikke ulǵaıtý josparlanǵan. Turǵyndardyń ótinishteri boıynsha 1500 beınabaqylaý kameralary kópqabatty turǵyn úı aýlalary men qoǵamdyq oryndarǵa qoıylatyn bolady. Kólik qozǵalysy asa baqylaýdy qajet etetin jol ýchaskelerine 2240 dana beınebaqylaý qurylǵylary ornatylady. Aıta keteıik, halyq qatysatyn bıýdjet azamattardyń jergilikti bıýdjet qarajatynyń bir bóligin bólý men jumsaýǵa qatysýyna múmkindik beretin joba. Iaǵnı, bir azamat usynyp, turǵyndardyń kópshiligi qoldaý bildirgen jobalar jergilikti bıýdjetten qarjylandyrylady. Osylaısha azamattar ózderi turatyn aýmaqtardy damytý men abattandyrýǵa qatysady. Jobany júzege asyrý úshin Shymkent qalasynda arnaıy is-shara jospary bekitilip, ol tórt aýdannyń ákimdikteri arqyly oryndalýda. Osy maqsatta arnaıy www.open-shymkent.kz ınternet resýrsy ázirlendi.
