ءبىرىنشى جارتىجىلدىقتا شىمكەنت قالاسىنىڭ ەكونوميكاسىندا وڭ دامۋ ديناميكاسى قامتاماسىز ەتىلدى. ونىڭ ىشىندە ادامي كاپيتالدىڭ ساپاسىن ارتتىرۋعا باسىمدىق بەرىلدى.بۇگىنگى تاڭدا شىمكەنت قالاسىنىڭ ءارى قارايعى وركەندەۋ باعدارى رەتىندە 5 باسىمدىق ايقىندالعان. ولار: ادامي كاپيتالدىڭ ءوسۋى، ينفراقۇرىلىمدىق دامۋ، كاسىپكەرلىكتى قولداۋ، تۇرعىن ءۇي قۇرىلىسىن جۇرگىزۋ، «شىمكەنت – تۇرعىندارعا قولايلى قالا» يدەياسىن ىسكە اسىرۋ. بەلگىلەنگەن باسىمدىقتار بويىنشا 2025 جىلعا دەيىنگى كەزەڭگە ارنالعان سالالىق باعدارلامالار ازىرلەنىپ، ىسكە اسىرىلۋدا.
ادامي كاپيتالدىڭ ءوسۋى شەڭبەرىندە شىمكەنت قالاسىنداعى ءبىلىم سالاسىنداعى وزەكتى ماسەلەلەردى كەزەڭ-كەزەڭىمەن شەشۋ جوسپارلانعان. قازىرگى كەزدە قالاداعى 186 مەكتەپتە 226 مىڭنان استام وقۋشى بار. ونىڭ ىشىندە 14 مەكتەپ ءۇش اۋىسىمدى بولسا، 5 مەكتەپ – ىڭعايلاستىرىلعان عيماراتتاردا ورنالاسقان، تاعى ءبىر مەكتەپ – اپاتتى دەپ تانىلعان. الداعى بەس جىلدا قالا شاعىن اۋداندارى مەن تۇرعىن الاپتارىندا 72 مەكتەپ سالىنادى. وسى باعىتتا بيىلدىڭ وزىندە 13 مەكتەپتىڭ قۇرىلىسى اياقتالىپ، پايدالانۋعا بەرىلەدى.
سالالىق جوسپار اياسىندا جوعارى جانە ءبىرىنشى ساناتتى مۇعالىمدەر ۇلەسىن الداعى بەس جىلدا بۇگىنگى 55 پايىزدىق كورسەتكىشتەن 85 پايىزعا دەيىنگى مەجەگە، ياعني 30 پايىزعا ارتتىرۋ جوسپارلانعان. كاسىپتىك ءبىلىم بەرۋ سالاسىندا وندىرىسكە قاجەتتى ماماندار دايارلاۋدى وزىق ادىستەمەگە نەگىزدەلگەن دۋالدى وقىتۋ مودەلىمەن ۇشتاستىرۋ كوزدەلگەن. بۇگىنگى تاڭدا قالامىزدا كاسىپتىك ءبىلىم بەرۋ وقۋ ورىندارىنىڭ 10 پايىزىندا عانا دۋالدى وقىتۋ مودەلى ەنگىزىلگەن. بۇل كورسەتكىش 2025 جىلعا قاراي 42 پايىزعا جەتەتىن بولادى.ءۇش اۋىسىمدى مەكتەپتەر ماسەلەسىن شەشۋدە جاڭا عيماراتتار، قوسىمشا وقۋ كورپۋستارىن سالۋ جۇمىستارى باستالدى. 2023 جىلعا قاراي بۇل ماسەلە تۇبەگەيلى شەشىمىن تاپپاق.
بيىلعى جىلى مەكتەپتەردى جابدىقتاۋعا 6 ملرد. تەڭگە كولەمىندەگى قاراجات باعىتتالعان. قارالعان قارجىعا ءبىلىم بەرۋ ۇيىمدارىنداعى 259 ءپان كابينەتتەرى جابدىقتالۋدا. بىلتىرعى جىلى شىمكەنت قالاسىنداعى مەكتەپتەردە ءاربىر 29 وقۋشىعا ءبىر كومپيۋتەردەن كەلەتىن بولسا، بيىل بۇل كورسەتكىش ءاربىر ءتورت وقۋشىعا ءبىر كومپيۋتەردەن كەلەتىن دەڭگەيگە جەتكىزىلدى.جىل سوڭىنا دەيىن قالاداعى بارلىق ءبىلىم بەرۋ ۇيىمدارىندا پوليتسيانىڭ باقىلاۋ جۇيەسىنە قوسىلعان بەينەباقىلاۋ كامەرالارى مەن تۋرنيكەتتەر ورناتىلادى.
اۆت. ماقپال
