بۇگىن اقيىق اقىن مۇقاعالي ماقاتاەۆتىڭ 90 جىلدىعىنا وراي ونىڭ تۋعان جەرىندە ەڭسەلى ەسكەرتكىش اشىلدى دەپ حابارلايدى "ادىرنا" ۇلتتىق پورتالى.
مەرەيتويلىق شارالارعا الماتى وبلىسىنىڭ اكىمى اماندىق باتالوۆ، مادەنيەت جانە سپورت ءمينيسترى اقتوتى رايىمقۇلوۆا، قر جازۋشىلار وداعىنىڭ توراعاسى ۇلىقبەك ەسداۋلەت، اقىننىڭ ۇلى جۇلدىز ماقاتاەۆ پەن كەلىنى باقىتگۇل ايداروۆا، تۇركسوي ۇيىمىنىڭ وكىلدەرى، پارلامەنت دەپۋتاتتارى، ەل زيالىلارى جانە اۋدان جۇرتشىلىعى قاتىسقان.
الماتى وبلىسى اكىمىنىڭ ءباسپاسوز قىزمەتى حابارلاعانداي، ەسكەرتكىشتى دايىنداۋعا وبلىستىق بيۋدجەتتەن 61,1 ملن تەڭگە جۇمسالعان. جۇمىستى مەردىگەر ۇيىم «تايقازان» جشس اتقاردى. ەسكەرتكىش قولادان قۇيىلعان، تۇعىرى گرانيتتەن دايىندالعان. جالپى ەسكەرتكىشتىڭ بيىكتىگى – 8,2 م، اۆتورى – ساۋلەتشى ا.رۇستەمبەكوۆ، ءمۇسىنشىسى – ق.كاكىموۆ. ەسكەرتكىش ورناتىلعان ورتالىق ساياباقتاعى الاڭدى اباتتاندىرۋعا زور ءمان بەرىلگەن. وسى ماقساتقا ءوڭىر بيۋدجەتىنەن 70,1 ملن تەڭگە قاراستىرىلىپ، اۋماق كوگالداندىرىلعان، سۋارۋ جۇيەسى جۇرگىزىلدى، جارىق شامدارى ورناتىلىپ، شاعىن ساۋلەتتىك فورمالار قويىلدى.
سالتاناتتى شاراعا قاتىسقان مەملەكەتتىك حاتشى قىرىمبەك كوشەرباەۆ:
«مۇقاعالي - جىردىڭ اسىل قازىناسى. ول - وتكەن مەن جاڭانىڭ اراسىن جالعاعان التىن كوپىر. ەلباسى مەن پرەزيدەنتتىڭ باستاماسىمەن اقىننىڭ عاسىرلىق تويىن يۋنەسكو كولەمىندە وتكىزۋگە ۇسىنىستار دايىندالۋدا. بۇگىنگى توي قۇتتى بولسىن. حالقىمىزدىڭ رۋحى مۇقاعالي جىرلارىنداي تازا، حانتاڭىرىندەي اسقاق، كولسايداي كورىكتى بولسىن»، - دەي كەلە، جينالعاندارعا قر پرەزيدەنتى قاسىم-جومارت توقاەۆتىڭ ارنايى قۇتتىقتاۋىن وقىپ بەردى.
بۇدان سوڭ قر مادەنيەت جانە سپورت ءمينيسترى اقتوتى رايىمقۇلوۆا، قر جازۋشىلار وداعىنىڭ توراعاسى، اقىن ۇلىقبەك ەسداۋلەت، تۇركسوي ۇيىمىنىڭ وكىلى اتاگەلدى كۇلتەگىن مۇقاعاليدىڭ قازاقتىڭ عانا ەمەس، تۇتاس تۇركى الەمىنىڭ، ادامزاتتىڭ اقىنى ەكەنىن تىلگە تيەك ەتىپ، تويدىڭ رۋحاني ماڭىزىن ەرەكشە اتاپ ءوتتى.
"ادىرنا" ۇلتتىق پورتالى.
